İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 324 Hüküm no: 224 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Valide Hanı’nda yerleşik Goloslu Dimitri Eşkina v. Dimo ve Andreya Petro Kokino v. Mike’nin Avrupa tüccarlarına vekil tayin edildikleri Avrupa vekîlleri. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki El-hâletü-hâzihî berren ve bahren Avrupa ticâretiyle me’lûf olanlar ve bundan böyle dahi izhâr-ı hâhiş ve arzu eden Devlet-i aliyyemin ehl-i zimmet re‘âyâsının ticâretleri taht-ı râbıta ve nizâma idhâl olunduğu sûretde ticâretlerine vüs‘at gelip hem tâife-i mesfûreye ve hem gümrükler îrâdına menâfi‘-i kesîreyi mûcib olacağı umûr-ı vâzıhadan olmağla re‘âyâ-yı Devlet-i aliyyemden olup Avrupa ticâretine hâhişger olan tüccâr beynlerinde cümlenin inzimâm-ı re’y ve intihâbıyla iki nefer vekîller nasb u ta‘yîn kılınıp beynlerinde vâki‘ umûr-ı muhâsebe ve kavâ‘id ve husûsât-ı sâire-i ticâretde nâfizü’l-kelim olmaları ve bâk[ī]si mersûm vekîllerin re’ylerine mütâba‘at ile muhâlif-i kavâ‘id-i mer‘iyye-i <> ticâret harekâta mütecâsir olanların iktizâ eden tedîbleri esnâfca icrâsına vekîlânın me’zûniyet ve me’mûriyetleri derc ve tasrîh olunarak nâzırlarının takrîr ve istid‘âsıyla bu bâbda başkaca fermân-ı âlî ısdâr ve beher sene mersûm vekîller tebdîl olunup cümlenin ma‘rifet ve intihâbıyla âharları yine bâ-fermân-ı âlî ta‘yîn olunmak husûsu bâ-hatt-ı hümâyûn verilen şurût-ı nizâmdan olduğuna binâen tüccâr-ı mersûmenin bu def‘a Rikâb-ı hümâyûnuma takdîm eyledikleri bir kıt‘a arzuhâllerinde geçen sene umûr-ı vekâleti idâre ve rü’yet etmek üzere bâ-fermân-ı âlî tüccârdan vekîl nasb u ta‘yîn kılınan Der-aliyye’mde Büyük Yeni Han’da mütemekkin Selanikli Yorgi v. Hristodolo ve Vâlide Hanı’nda mütemekkin Sakızlı Yani Rodokanaki v. Kozi nâm vekîllerin müddet-i vekâletleri munkazıye olduğuna binâen işbu bin iki yüz yirmi iki senesi Haziran’ı ibtidâsından i‘tibâr ile bir sene-i kâmile umûr-ı vekâleti rü’yet etmek üzere berat-ı âlî-şânımla Avrupa ticâretine me’zûn olan re‘âyâ-yı Devlet-i aliyyemden Dersa‘âdet’imde Vâlide Hanı’nda mütemekkin Goloslu Dimitri Eşkina v. Dimo nâm tâcir ile yine tüccâr-ı mersûmenin mu‘teberlerinden Andreya Petro Kokino v. Mike nâm bir nefer fermânlu tâcir cümlesinin re’y ve ma‘rifetleriyle intihâb olunduğu beyânıyla ber-mûceb-i şurût-ı nizâm vekîl nasb u ta‘yîn olunmaları bâbında yedlerine vekâleti hâvî emr-i şerîfim i‘tâsını istid‘â eylediklerin hademe-i Devlet-i aliyyemden Rikâb-ı hümâyûnum Beylikcisi olup Avrupa Tüccârı Nâzırı olan kıdvetü’l-emâcid ve’l-ekârim Mehmed Seyyidâ -zîde mecduhû- bir kıt‘a memhûr takrîriyle ifâde etmekle tâcirân-ı mersûmân vech-i meşrûh üzere tüccâr-ı merkūmeye vekîl nasb u ta‘yîn olunmak fermânım olmağın imdi ber-mûceb-i şurût-ı nizâm tâife-i mersûmenin beynlerinde vâki‘ olan umûr-ı muhâsebe ve husûsât-ı sâirelerini [bir] sene-i kâmile vekîlân-ı mersûmân rü’yet ve tüccâr-ı mersûme dahi re’ylerine mütâba‘at ve kavâ‘id-i tüccâra münâfî harekâta mübâderet eyleyenlerin nâzır-ı mûmâ-ileyh ma‘rifetiyle levâzım-ı tedîblerinin icrâsı için üzerlerine mersûmân vekîl nasb u ta‘yîn kılındığı ve mersûmânın vekâleti umûruna kimesne taraflarından müdâhale ve ta‘arruz olunduğuna rızâ-yı aliyyem olmadığı sen ki mevlânâ-yı mûmâ-ileyhsin, ma‘lûmun oldukda ber-vech-i meşrûh amel ve harekete dikkat olunmak ve hilâf-ı şurût ve münâfî-i emr ve rızâ vaz‘ ve hâlât tecvîz olunmamak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından hazer ve mücânebet eyleyesiz. Şöyle bilesiz alâmet-i şerîfe i‘timâd kılasız. Tahrîr[en] fî-evâili şehri Rebî‘ülâhir sene 1222 Be-makām-ı Kostantıniyyeti’l-mahrûse