İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 326 Hüküm no: 225 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki tuhafiyeci dükkânlarında, Frenk malı Müslüman kadın giyim eşyası ve zaten yasak olan İngiliz mallarının satılmaması Bâ-sah. İstanbul Kādısı Fazîletlü Efendi Ulü’l-emr ve sahib-i siyâset olanlara nusûs-ı Furkāniyye ile memnû‘ olan isrâf ve sefâhat ve fevâhişden zîr-i dest-i hükûmetinde vedî‘a-i cenâb-ı Kibriyâ olan ümmet-i Muhammed’i tav‘an ve kerhen men‘ ve zecr etmek nehy-i ani’l-münker farîzasından olmağla bir müddetden beri tâife-i nisvân pul işleme esvâba ve Frengâne bürüncük gömlek ve kurdele ile ma‘mûl urupalara ziyâde inhimâk eylediklerinden nâşî bundan akdem bey‘ u şirâsı memnû‘ olan İngiltere emti‘ası bu bahâne ile yine revâcda olduğundan başka bu makūle diyâr-ı Efrencden gelen emti‘a ve eşyâ Âsitâne-i sa‘âdetde satılmayıp getiren Efrenc tüccârı Galata’da ba‘zı mağazalar istîcâr ve getirdikleri eşyâyı vaz‘la ol tarafda bey‘ edegeldikleri cümleye ma‘lûm olan mevâddan iken bir müddetden beri ba‘zı re‘âyâ bu ticârete dadanıp İstanbul’un ba‘zı sûkunda tuhafcı dükkânı ta‘bîriyle birer dükkân peydâ ve âvîze ve ayna füruhtu bahânesiyle ehl-i İslâma lâyık olmayan ba‘zı kurdele ve bürüncük ve bunlar emsâli eşyâ füruhtunu âdet eylediklerinden [85a] sekene-i İstanbul’un ale’l-husûs nisâ tâifesinin tabî‘atları bu makūle isrâfâta meylederek nâs refte refte hadlerini tecâvüz ile ale’l-umûm bu gûne telef ve sefâhata meyl ve mütâba‘at ve tüccâr tâifesi dahi bu kârda revâc müşâhedesiyle katı çok tuhafcı dükkânları ve mağazalar küşâd edip o makūle ehl-i İslâma lâyık olmayan edevât-ı Efrenciyyeyi ve bu bahâne ile memnû‘ olan İngiltere emvâlini İstanbul içinde âşikâre bey‘ u şirâya cesâret etmiş oldukları zâhir u ayân ve süfehâ-yı kavm ve ekseri tâife-i nisvân takım takım o misillü dükkân ve mağazalar önünde eğlenmekde ve bu takrîble türlü türlü âsâm ve mefâsid zuhûr eylemek meşhûd-i bâsıra-i tahkīk ve îkān olmakdan nâşî sekene-i Dârü’s-saltana’nın bu makūle seref ü sefâhatdan men‘i bâbında mübârek hatt-ı hümâyûn-ı şevket-makrûn-ı Pâdişâhî şeref-yâfte-i sahîfe-i sudûr olmağla imdi zikrolunan dükkânlar pîşgâhında gerek süfehâ-yı kavm ve gerek tâife-i nisvânın vâki‘ olan tavr-ı bî-edebânelerinin men‘ini dahi müstelzim olmağla imdi fîmâ-ba‘d fincân ve kâse ve nargile şişesi ve ayna ve bardak ve billûr evânî misillü emti‘a satan kadîm dükkânlardan mâ‘adâ İstanbul içinde gerek tuhafcı dükkânı ve gerek mağazası var ise dükkânlarını emti‘a-i mezkûreden tahliye edip ve hâdis olan dükkân ve mağazalar ehl-i İslâma lâzım olan emti‘a ve duhan füruht etmek misillü alış-veriş eylemek ve bugünden sonra pul ve kur[de]le ve bürüncük ve bunun emsâli İngiliz emti‘ası füruhtundan ittikā ve mücânebet olunmak husûsunu iktizâ edenlere tenbîh ve te’kîde mübâderet ve hilâf-ı fermân bey‘ u şirâya cesâret eder olur ise haklarında ukūbetden gayri mu‘âmele olunmayacağını ifâde ve tefhîme müsâra‘at ve bu bahâne ile emti‘a-i kadîme ile alış-veriş edenlerin çarh-ı dâd ü si[te]dlerine halel gelmemesine mezîd-i ihtimâm ve dikkat eyleyesiz deyü. Fî 19 Rebî‘ülâhir sene 1222