İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 327 Hüküm no: 226 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gayrimüslimlerin, Müslümanların giydiği elbiseleri giymemeleri, bilhassa kadınlarının başlarına yeşil sarmamaları Bâ-sah. İstanbul Kādısı Fazîletlü Efendi Ehl-i zimmet Rum ve Ermeni ve Yahûd tâifesi fi’l-asl kendilere alâmet ve şi‘âr olan kisâye-i mahsûsalarını biraz vakitden beri tağyîr ile ehl-i İslâma mahsûs elbise iksâsına ve bâ-husûs nisvânı başlarına yeşil sarmağa cesâret eyledikleri mu‘âyene ve müşâhede olunup men‘-i ekîd ile men‘i ve memnû‘ olmayanların tedîbi ehemm ü elzem ve matlûb ve mültezem olmağla imdi basmacılar ve boyacılar ve yemenîciler ve dülbendciler kethudâlarını ve ihtiyârlarını ve Rum ve Ermeni patrikleriyle Yahûd tâifesinin Hahambaşı ve cemâ‘atbaşılarını huzûrunuza getirtip fîmâ-ba‘d esnâf-ı merkūme re‘âyâ-yı mersûmûna yeşil boya boyamamak ve füruht etmemek üzere esnâf-ı merkūme kethudâlarına muhkem tenbîh ve tahzîr bundan böyle erkekleri ve dişileri ehl-i İslâma taklîd libâs giymeyip ve husûsiyle karıları başlarına yeşil sarmayıp resm-i kadîm üzere kisve-i mahsûsaların iksâ eylemek üzere alâ-vechi’t-tehdîd tenbîh eylemelerini patriklere ve hahambaşı ve cemâ‘atbaşılarına ifâde ve tefhîm ve bundan sonra tefahhus olunup hilâf-ı fermân-ı âlî hareket eyleyenleri ahz ve eşed vechile tedîb ve adem-i ihtimâmlarına haml ile kendileri dahi muâhaze ve tağrîb olunacağı mukarrer idiğini tebyîn ve telkīne mübâderet eyleyesiz deyü. Fî 2 Ca sene 1222