İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 329 Hüküm no: 228 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahve narhı Bâ-sah. İstanbul Kādısı Fazîletlü Efendi Attar esnâfının yedlerinde olan kahve ekall-i kalîl kalıp tevzî‘a muhtâc olduklarını huzûr-ı şer‘de ifâde ile istirhâm etmeleriyle esnâf-ı merkūmenin el-hâletü hâzihî kahvenin yirmi beş dirhemini otuz altı paraya bey‘ eylemeleri hadd-i i‘tidâlden hâric olduğundan lâyıkı vechile tenzîli lâzım gelir keyfiyet erbâb-ı vukūf ile müzâkere olundukda el-yevm çiğ kahvenin narhı olan on bir guruş beş paradan yetmiş yedi para tenzîl ile dokuz guruş sekiz paraya bey‘ olunarak döğülmüş kahvenin yirmi beş dirhemi otuz paraya ibâdullâha bey‘ eylemeleri elvereceğini ifâde ve ihbâr etmeleriyle ol vechile tenzîl veyâhûd sâbıkı vechile ibkāsı irâde-i seniyyeye menût idiğini mübeyyin bu def‘a irsâl eylediğiniz bir kıt‘a takrîr mübârek Rikâb-ı hümâyûn-ı mülûkâneye arz olundukda; takrîriniz vechile çiğ kahvenin beher vakıyyesi dokuz guruş sekiz paraya tenzîl ve râbıta verilerek döğülmüş kahvenin yirmi beş dirhemi otuz paraya bey‘ u şirâ olunması bâbında hatt-ı hümâyûn-ı itâ‘at-makrûn-ı şâhâne şeref-yâfte-i sudûr olmağla imdi esnâf-ı merkūmeyi huzûr-ı şer‘a ihzâr ile mantûk-ı münîf-i hatt-ı şerîfi kendilere ifâde ve beyân ederek mûcebince amel ve hareket ve hilâfından be-gāyet tevakkī ve mübâ‘adet eylemelerini müekkeden tenbîhe mübâderet ve siz dahi bu husûsa dâimâ dikkat ve nezâret eyleyesiz deyü. Fî 20 Ca sene [1]222