İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 345 Hüküm no: 236 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman kadınların renkli, büyük yakalı, Frenk kurdelesinden dikilmiş ferace ve açık yaşmak giyinerek sokağa çıkmamaları. Bâ-sah. İstanbul Kādısı Fazîletlü Efendi Nisvân tâifesinin bed-renk ve büyük yakalu Frenk kurdele ve şerit ile dikilmiş ferâce ve küçük başlar giymeyip kadîm başlar ve münâsib yaşmak ile esvâk ve pazarda ırz u edebleriyle geşt ü güzâr eylemeleri bundan akdem mahsûs beyâz üzerine fermânlar ısdârıyla tenbîh ve te’kîd olunmuş iken el-hâletü hâzihî o makūleler hilâf-ı fermân bed-renklü ve büyük yakalu Frengî kurdele ile ma‘mûl ferâce ve küçük başlar ve açık yaşmak ile meşhûd olup fîmâ-ba‘d zâbitân ma‘rifetleriyle çâk olunarak tedîblerine i‘tinâ olunmak musammem olmak hasebiyle evvelce bir kerre dahi mahalle imâmları ma‘rifetiyle herkese tenbîh ve te’kîd olunmak ve bundan sonra dahi mütenebbih olmazlar ise zâbitâna fermânlar ısdârıyla tedîbleri irâde kılınmak tasvîb olunmağla imdi Dersa‘âdet’de olan bi’l-cümle mahallât imâmlarını huzûrunuza ihzâr ile nisvân tâifesinin yasağ-ı Pâdişâhînin hilâfı bed-renklü ve büyük yakalu ferâce ve küçük başlar ve bî-edebâne yaşmak ile esvâka çıkmamalarını ve eğer bundan sonra o misillü heyet ile bir nefer hatun meşhûd olur ise tedîbleri zâbitâna tenbîh olunacağını tebyîn ve te’kîde müsâra‘at eyleyesiz deyü. Fî-gurreti Receb sene 1222