İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 345 Hüküm no: 237 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daha önce Nizâm-ı Cedid sebebiyle ihdas edilmiş olan isimleri yazılı mukataaların ve resmlerin kaldırıldığı Bâ-sah. İstanbul Kādısı İzzetlü, Fazîletlü Efendi Nizâm-ı Cedîd takrîbiyle bir müddetden beri tahsîl olunmakda olan rüsûmât-ı muhdesenin ref‘iyle fukarâ-yı ra‘iyyetin istihsâl-i esbâb-ı refâh ve âsâyişi husûsuna irâde-i kerâmet-ifâde-i mülûkâne müte‘allik olduğuna binâen ref‘ olunan rüsûmât-ı muhdese-i mezkûre ne makūle şeyler idiği ma‘lûm olmak için mahallerinden suâl olundukda Îrâd-ı Cedîd ta‘bîriyle tahsîl olunmakda olan rüsûmât, resm-i yapağı ve mazı ve kökboyası ve alacehr[i] ve palamud ve fesboyası iki yüz yirmi üç senesinden ve Tersâne-i âmire tarafından idâre olunmakda olan Mîzân-ı Harîr rüsûmâtı dahi iki yüz yirmi senesi Cumâdelûlâsı’nın üçüncü gününden i‘tibâr ile külliyen ref‘ olunmuş olduğu ve zecriye olarak hamrın beher kıyyesinden ikişer ve arakın beher kıyyesinden dörder para alınmak üzere bundan akdem mahsûsan resm ta‘yîn olunmuş iken bu def‘a ordu-yı hümâyûnun hurûcundan mukaddem bir zı‘fı zam birle hamrın beher vakıyyesinden dörder ve arakın sekizer para alınmakda olmağla bu resm dahi muhdesât nev‘inden olup lâkin ibâdullâha sehim verilmiş olmak takrîbiyle ref‘i ashâb-ı eshâma gadri mûcib olacağından fakat hamrın beher kıyyesine zammolunan ikişer para ile araka zammolunan dörder para ref‘ olunup işbu bin iki yüz yirmi iki senesi Cumâdelûlâsı’nın on beşinci gününden i‘tibâren iktizâ eden mahallere ilmühaberleri i‘tâ olunduğu ve Tersâne-i âmire ocaklığından olan Gelibolu Kirpası Damgası Mukāta‘ası dahi yirmi üç senesinden i‘tibâr ile ref‘ olunup Mukāta‘a-i merkūmenin kaydı ref‘ olunmak için ordu-yı hümâyûna ve Tersâne-i âmire taraflarına ilmühaberleri verildiği ve medîne-i Üsküdar’da Kavak Sarayı arsasında Hudâvendigâr-ı sâbık hazretlerinin Selimiye ismiyle müsemmâ Câmi‘-i şerîfleri Vakfı’ndan olan Gön ve Çarıkçıbaşılık Mukāta‘ası dahi muhdesâtdan olduğundan sâdır olan hatt-ı hümâyûn mûcebince ref‘ olunup işbu sene-i mübâreke Cumâdelâhire’sinin yirmi dördüncü günü târihiyle Rumeli ve Anadolu’nun iktizâ eden mahallerine evâmir-i şerîfe ısdâr ve irsâl olunmuş olduğu ve Eskişehir ve İnönü taraflarında müceddeden ihdâs olunan Resm-i Ma‘den-i Lüle Mukāta‘ası dahi muhdesâtdan olmak mülâbesesiyle fakat mâlikânelik kaydı ref‘ olunup Mukāta‘a-i mezkûrenin mâlı olan senevî beş yüz guruş ahâlî-i memleket tarafından beher sene Hazîne-i âmireye edâ olunmak şartıyla işbu iki yüz yirmi iki senesi Cumâdelûlâsı’nın yirmi yedinci günü kezâlik emri ve ilmühaberi i‘tâ olunmuş olduğu derkenâr olunmağla imdi el-hâletü hâzihî ref‘ ve ilgā olunan rüsûmât-ı muhdese bunlardan ibâret olup mevâdd-ı mezkûre sicill-i mahfûza kayd ve bunlara dâir olan husûsât ve de‘âvîde siz dahi lede’l-iktizâ ona göre muktezî olan harekâtın icrâsına dikkat eyleyesiz deyü. Fî 22 Receb sene [1]222