İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 355 Hüküm no: 242 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Darphane’de imal edilen fındık rub’iyesinin 2 kuruştan daha fazla fiyatla alınıp verilmemesi Bâ-sah. İstanbul Kādısı Fazîletlü Efendi Darbhâne-i âmirede i‘mâl olunan fındık rub‘iyesinin fiyât-ı mu‘ayyenesi ikişer guruşa olup Darbhâne-i âmireden el-yevm fiyât-ı mezkûre ile verilmekde ise dahi sûk ve pazarda doksan ve ba‘zan doksan beşer paraya ahz ü i‘tâ olunmak takrîbiyle bu keyfiyet mu‘âmelât-ı nâsın ihtilâline bâ‘is olduğu vâsıl-ı sâmi‘a-i hazret-i cihân-dârî olup fîmâ-ba‘d fiyât-ı mu‘ayyenesi olan ikişer guruşdan bir akçe ziyâdeye ahz ü i‘tâ olmamak ve ziyâdeye alıp vermeğe cesâret edenler ahz ü girift ile tedîb ve tenkîl olunmak husûsuna irâde-i kātı‘a-i mülûkâne müte‘allik olmağla imdi fiyât-ı mu‘ayyene-i mezkûreden ziyâdeye alınıp verilmemesini ve fiyât-ı mukarrere-i mezkûreden ziyâdeye alıp veren olur ise ahz ü girift olunup ukūbât-ı şedîde ile tedîb ve tenkîl olunacağını Bedesten ve bi’l-cümle esnâf kethudâları ve sâir lâzım gelenlere gereği gibi tenbîh ve te’kîde mübâderet ve bu husûsa dâimâ i‘tinâ ve nezâret eyleyesiz deyü buyruldu. Fî 9 Ş sene 1222