İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 366 Hüküm no: 250 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman kadınların renkli, uzun yakalı ferace ve küçük başlık giymemeleri Bâ-sah. İstanbul Kādısı Fazîletlü Efendi Nisvân tâifesi bir müddetden beri esvâk ve pazarda bed-renk ve uzun yakalı ferâceler ve küçük başlar ile geşt ü güzâr eylediklerinden bu gûne vaz‘ ve reftâr nice nâsı vizr u vebâle giriftâr eylediğinden men‘ ve tahzîri bâbında mukaddemâ fermân ısdârıyla tenbîh ve yasak olunmuş idi. Mizâc-ı nisvân seref ü sefehe mâil olduğundan memnû‘ olmayıp mugāyir-i emr ve tenbîh bu def‘a yine topuklarına beraber yaka[lu] ve bed-renk ferâce ve küçük başlar ile cem‘iyetgâh-ı eşhâsda bî-pervâ geşt ü güzâra başladıkları meşhûd olduğuna binâen vaz‘ ve reftârlarından rücû‘ ile fîmâ-ba‘d ehl-i ırz kıyâfetinde olmaları için iktizâ-yı tedîbleri icrâsı lâzım gelmiş ise dahi za‘af-ı kalblerine terahhumen bu def‘a tedîblerinden sarf-ı nazar olunup eğer bundan sonra bed-renk, uzun yakalı ferâce ve küçük baş ile birine tesâdüf olunur yâhûd kol kol ta‘yîn olunan tebdîllerden birisi haber verir ise icrâ-yı ukūbetlerinde dakīka fevti tecvîz olunmamağla her mahallenin imâmlarını çağırtıp fîmâ-ba‘d tâife-i nisâ uzun yakalı, bed-renk ferâce ve küçük baş giymemek ve ehl-i ırz kıyâfet büyük başlar ile kudemâ-reftâr ferâceler giyip bir arşından ziyâde yaka isti‘mâl eylememek üzere mahallât imâmları ve sâir iktizâ edenlere tenbîhe dikkat ve eğer mütenebbih olmazlar ise başları ve ferâceleri yakaları kesilip bu makūleler her kimin dâhil-i ıyâli ise onun hakkında dahi mûcib-i vahâmet olacağını beyân ve tahzîre mübâderet eyleyesiz deyü buyruldu. Fî 13 L. sene 1222