İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 366 Hüküm no: 251 Orijinal metin no: [96b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici esnafına, yasağa rağmen sivri burunlu ayakkabı, mest vs. imal ve satışına devam ettikleri takdirde cezalandırılacakları hususunda tembihte bulunulması Bâ-sah. İstanbul Kādısı Fazîletlü Efendi Dikici esnâfı tama‘ ve irtikâba mebnî mukaddemâ [bâ]-fermân-ı âlî memnû‘ olan sivri burunlu ayakkablarını şimdi yine dikip ba‘zı haddini bilmez hademe ve sâir kimesneler ziyâde bahâya iştirâ ile bilâ-mûcib bezr u isrâfa mübtelâ olduklarından ayakkabları bahâya çıkıp ehl-i ırz olanlar dahi tarz-ı âharını bulamadıklarından zarûrî onlara iktifâ ile o makūle ayakkabları giymeğe ihtiyâr edip mukaddemâ esnâf-ı mezkûrenin kālıbları kesilmiş ve bir dahi sivri burunlu mest ve pabuç ve çizme ve çedik dikmemek ve alıp satmamak üzere muhkem tenbîh olunmuş iken yine memnû‘ ve mütenebbih olmadıklarından bu husûs herkese ziyâde masrafı mûcib ve dikiciler mağbût bir esnâf olduğundan taht-ı nizâma idhâlleri ibâdullâhı masrafdan vikāyeti müstevcib olmağla imdi esnâf kethudâları ve yiğitbaşılarını çağırtıp bundan sonra her kim sivri burunlu mest ve pabuç ve çizme ve çedik dikip füruht [97a] eder ise görüldüğü mahâlde ahz ü girift ile kimden aldığı ba‘de’t-tahkīk alan ve satan sâire ibreten siyâset olunacaklarını ve tertîb-i cezâlarında hâtır ve gönüle bakılmayacağını kendilere tenbîh ile fîmâ-ba‘d o makūle ayakkabı dikmemek ve mu‘tedilce ve vaz‘-ı kadîm üzere yassı burunlularını dikip füruht eylemek üzere te’kîd eyleyesiz deyü buyruldu. Fî 13 L. sene 1222