İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 375 Hüküm no: 258 Orijinal metin no: [100a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Yeni Han’da yerleşik Halebli Bogos’a verilen Acem, Hindistan ve Avrupa tüccarı beratının İstanbul Bab Mahkemesi’ne kaydedilmesi Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki El-hâletü-hâzihî berren ve bahren Acem ve Hindistan ve Avrupa ticâretiyle me’lûf olanlar ve bundan böyle izhâr-ı hâhiş ve arzu eden Devlet-i aliyyemin ehl-i zimmet re‘âyâsının ticâretlerinin taht-ı râbıta ve nizâma idhâlleri husûsuna irâde-i seniyye ta‘alluk edip tâife-i mesfûrenin ticâretleri Acem ve Hindistan ve Avrupa diyârlarına münhasır olmağla müste’men tercümanları ve hizmetkârlarının nâil oldukları imtiyâz ve emniyet ve müsâ‘ade ve ri‘âyet tamamen bunların haklarında bilâ-istisnâ icrâ kılınması rüsûm-ı ra‘iyyet-perverîden olduğu ecilden o makūle tüccâra ve hizmetkârlarına şerâit-ı lâzıme derciyle yedlerine başka başka berevât ve evâmir i‘tâ olunması husûsu bâ-hatt-ı hümâyûn verilen şurût-ı nizâmdan olduğuna binâen Der-aliyye’mde Yeni Han’da mütemekkin Halebli Bogos Gadban v. Dimyanos yedine şurût-ı nizâm üzere mufassal ve meşrûh ticâret beratı i‘tâ olunduğu beyânıyla ber-mûceb-i şurût-ı nizâm yedine verilen berat-ı şerîfim İstanbul Bâb Mahkemesi’ne kayd ve mûceb ü muktezâsıyla amel ve hareket ve himâyet ü sıyânet olunmak bâbında emr-i şerîfim sudûrunu tüccâr-ı mesfûrenin vekîlleri istid‘â eylediklerin hademe-i Devlet-i aliyyemden olup tüccâr-ı merkūmenin nâzırı olan Rikâb-ı hümâyûnum Beylikcisi kıdvetü’l-emâcid ve’l-ekârim Mehmed Seyyidâ (Seydâ?) -zîde mecduhû- bir kıt‘a memhûr takrîriyle ifâde etmekle vech-i meşrûh üzere amel olunmak fermânım olmağın imdi ber-minvâl-i [muharrer mersûm] Acem ve Hindistan ve Avrupa tüccârından olmak üzere ber-mûceb-i şurût-ı nizâm yedine verilen berat-ı âlî-şânımı İstanbul Bâb Mahkemesi’ne sebt ü kayd birle yedinde ibkā ve mûceb ü muktezâsıyla amel ve hareket ve himâyet ü sıyânet olunup ve mugāyir-i şurût-ı berat hâlât tecvîz olunmamak bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından ittikā ve mübâ‘adet eyleyesin. [Şöyle bilesin]; alâmet-i şerîfe i‘timâd kılasın. Tahrîren fî-evâsıtı şehri Zilka‘deti’ş-şerîfe li-sene isnâ ve işrîn ve mieteyn ve elf. Be-makām-ı Kostantıniyye