İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 376 Hüküm no: 259 Orijinal metin no: [100a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osmanlı ordusu için 42 adet Sirem arabası hazırlanması Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim Dergâh-ı mu‘allâm Yeniçerileri Sekbânbaşısı Mustafa -dâme mecduhû- tevkī‘-i refî‘-i hümâyûn vâsıl olucak ma‘lûm ola ki El-hâletü-hâzihî Rusyalu ile her ne kadar mütâreke derkâr ise dahi Devlet-i aliyyem dâimâ seferber hükmünde olmak şerâit-ı ihtiyâtıyeden olmakdan nâşî işbu sene-i mübâreke evvel-bahârında ordu-yı hümâyûnumda iktizâ eden hidemât-ı seferiyede istihdâm olunmak üzere şimdiden müstevfî Sirem arabaları tertîb ve tedârükünden lâ-büd olduğuna binâen sâbıkı mûcebince yola girdikleri günden i‘tibâr ile ber-vech-i mu‘tâd îcâb eden ücretleri Arabacıbaşı yedinden verilmek şartıyla derûn-ı emr-i şerîfime mevzû‘an gönderilen memhûr ve mümzâ sûret-i defter nâtık olduğu üzere gayr-ı ez-tenzîl Âsitâne-i sa‘âdetimden tertîb olunan kırk iki kıt‘a Sirem arabaları kavî ve muhkem ve bargirleri güçlü ve kuvvetlü olmaları şartıyla intihâb olunarak tedârük ve ihrâc ve arabacıbaşıya teslîm olunmak üzere vakt ü zamanıyla ordu-yı hümâyûnuma îsâl ve tesbîli husûsuna sarf-ı makderet olması fermânım olmağın hâssaten işbu emr-i âlî-şânım ısdâr ve irsâl olunmuşdur. İmdi vusûlünde siz ki mevlânâ ve sekbânbaşı-i mûmâ-ileyhimâsız, ol mikdâr Sirem arabalarını kavî ve muhkem ve bargirleri güçlü ve kuvvetlü olmak şartıyla şimdiden intihâb ve tedârük ve vakt ü zamanıyla Ordu-yı hümâyûnum arabacıbaşısına teslîm olunmak üzere mecmû‘unu bilâ-noksan ordu-yı hümâyûnuma irsâl ve tesbîl ettirilmesi husûsuna bi’l-ittifâk ihtimâm ve dikkat ve ihmâl ü müsâmaha misillü vaz‘ ve hâlâtdan tevakkī ve mübâ‘adet eylemeniz bâbında fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda vech-i meşrûh üzere [100b] şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi birle âmil olasız. Şöyle bilesiz alâmet-i şerîfe i‘timâd kılasız. Fî 15 Za sene 1222 Be-makām-ı Kostantıniyye