İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 386 Hüküm no: 267 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul İhtisab Mukataası’nın 1/3 hissesinin işletmesinin, 1223 senesi Mart ayı başından Şubat ayı sonuna kadar 1 yıllığına emanet usulüyle Mustafa isimli şahsa verildiği Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Bâ-hatt-ı hümâyûn-ı şevket-makrûnum Darbhâne-i âmiremden zabt ve idâre olunan mukāta‘at-ı mîrîyyeden İhtisâb-ı İstanbul ve Tevâbi‘i Mukāta‘ası’nın sülüs hissesi bin iki yüz yirmi üç senesi Mart’ı ibtidâsından Şubat’ı gāyetine değin bir sene-i kâmile emâneten zabt u rabteylemek üzere der-uhdesine tâlib ve râgıb olan kıdvetü’l-emâsil ve’l-akrân Mustafa -zîde kadrühû-ya fermân-ı âlî-şânımla beher mâh îrâd ve masârifi defteriyle hâsılâtını Darbhâne-i âmireme arz eylemek şartıyla ber-vech-i emânet der-uhde ve tefvîz ve ol dahi tefevvüz ve kabûl birle ber-minvâl-i meşrûh Mukāta‘a-i merkūmeyi sene-i mezbûreye mahsûben zabt u rabt ve hâsılât ve rüsûmâtın kānûn-ı kadîm ve olageldiği üzere ahz ü kabz eyleyip taraf-ı âhardan müdâhale olunmamak üzere emâneten zabtı için emr-i şerîfim i‘tâsı bâbında hâlâ Darbhâne-i âmirem nâzırı iftihârü’l-emâcid ve’l-ekârim es-Seyyid Mehmed -dâme mecduhû- memhûr temessüğüyle inhâ etmeğin imdi mûcebince zabtettirilmek fermânım olmuşdur. Buyurdum ki: Hükm-i şerîfim vardıkda bu bâbda sâdır olan emrim üzere amel edip dahi sen ki mevlânâ-yı mûmâ-ileyhsin, sene-i merkūmeye mahsûben şart-ı mezkûr üzere mûmâ-ileyhin yedine i‘tâ olunan işbu emr-i âlî-şânım mûcebince Mukāta‘a-i merkūmenin hisse-i mezkûresini sene-i merkūme Mart’ı ibtidâsından Şubat’ı gāyetine değin bir sene-i kâmile emâneten zabt u rabt ve hâsılât ve rüsûmâtın kānûn-ı kadîm ve olageldiği üzere ahz ü kabz ve cem‘ ü tahsîl ettirtip mugāyir-i emr-i âlî-şânım mûmâ-ileyhin zabt u rabtına taraf-ı âhardan müdâhale ve ta‘arruz ettirmeyesin. Şöyle bilesin alâmet-i şerîfe i‘timâd kılasın. Fî 4 Muharrem sene 1223 Be-makām-ı Kostantıniyye