İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 394 Hüküm no: 273 Orijinal metin no: [106a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zahire tevzii sırasında Boğaziçi tarafı bakkallarının eline, tevzi olunan zahirenin cins ve miktarlarını gösterir Kapan naibi tarafından bir belge verilmesi Bâ-sah. İstanbul Kādısı Fazîletlü Efendi El-hâletü-hâzihî Boğaziçi’nde vâki‘ bakkāl dükkânlarına diyerek Dersa‘âdet’den revgan-ı zeyt ve sabun misillü zehâir mah[â]ll-i sâireye imrâr olunmakda olduğu ihbâr ve tahkīk olunduğundan bu emr-i münkerin men‘i için ba‘d-ezîn Boğaziçi bakkāllarına revgan-ı zeyt ve sabun ve zehâir-i sâire verildikde her hangi mahâllin bakkālı ise ol mahâl [ve] verilen zehâir ne ise cins ve envâ‘ı ve mikdârı tasrîh olunarak yedine Kapan Nâibi Efendi tarafından tezkire verilip tezkiresiz zahîre nakledenler olur ise Gümrük’den bi[‘t]-taharrî zahîreleri zabt ve tevkīf olunmak husûsuna irâde-i seniyye ta‘alluk olarak bu husûs Gümrük emîni efendi’ye beyâz üzerine fermân-ı âlî ısdârıyla mahsûs tenbîh olunmağla imdi fîmâ-ba‘d Boğaziçi bakkāllarına revgan-ı zeyt ve sabun ve zehâir-i sâire verilmek lâzım geldikde hangi mahâllin bakkālı ise ol mahâllin ismi ve verilen zehâirin cins ve envâ‘ ve mikdârı tasrîh olunarak yedine Kapan nâibi efendi tarafından tezkire verilip bilâ-tezkire habbe-i vâhide zahîre verilmemesini nâib-i mûmâ-ileyh[e] tenbîh ve te’kîde mübâderet eyleyesiz deyü. Fî-gurreti Ra sene 1223