İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 401 Hüküm no: 280 Orijinal metin no: [109a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kötü niyetli kişilerin haksız davalar açıp insanlara zulmetmelerini önlemek için dikkat edilmesi gereken hususlar İhkāk-ı hak husûsuna dâir fermân. Bâ-sah. Sadr-ı Rum ve İstanbul Kādısı İzzetlü, Fazîletlü Efendiler Hazarâtı Öteden beri cemî‘ mahâkimde görülen da‘vâ fermân-ı âlî ile görülüp fermânsız rü’yet olunan da‘vâ dahi gāyet dikkat olunarak ve şâhidleri tezkiye kılınarak şer‘an fasl ve i‘lâm olundukdan sonra Bâb-ı Âlî’ye gönderilip i‘lâm-ı şer‘î mûcebince herkesin hakkı icrâ olunmak kā‘ide-i kadîmeden iken bir müddetden beri ba‘zı müzevvir gürûhu gûnâ-gûn da‘vâları ihdâs edip sûret-i şer‘a koyarak kenar mahkemelerde bir takrîb i‘lâm ettirdikden sonra kimi Ağa Kapısı’na ve kimi Bostancıbaşı habsine ve kimi zindâna irsâl ve habs ve ihâfe olunarak nâ-hak yere gadr vukū‘a geldiğinden bu husûsda ibâdullâhı gadr ve hasârdan sıyânet lâzımeden ve muktezâ-yı şer‘-i şerîfin icrâsı farîzadan olmağla imdi fîmâ-ba‘d gerek huzûrunuzda ve gerek mahâfil-i sâirede görülen da‘vâ bilâ-fermân olduğu sûretde dahi ba‘de’l-i‘lâm muhzırlar Ağa Kapısı ve zindân mahbesine götürmeyip Bâb-ı Âlî’ye getirmek ve de‘âvî ve şâhidlere dikkat ve tezkiye olunarak ber-muktezâ-yı şer‘-i mutahhar fasl ve hasm olunmak husûsunu mahkemelere ve sâir lâzım gelenlere tenbîhe himmet ve ihkāk-ı hak maddesi kemâliyle dikkat olunacak mevâddan olmağla cenâbınız dahi bi’z-zât dikkat ve nezâret eyleyesiz deyü buyruldu. Fî 18 B sene [12]23