İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 402 Hüküm no: 281 Orijinal metin no: [109a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnafının içine girerek nizamı bozan ve ambarlardaki zahireyi beğenmeyip devleti zarara uğratan kişilerin cezalandırılacağı Habbâzâna müte‘allik fermân. Bâ-sah. İstanbul Kādısı İzzetlü, Fazîletlü Efendi Hazretleri Bir seneden beri habbâzân esnâfının içlerine duhûl eden ba‘zı müfsid ve muharrik kimesneler kendi cerr-i menfa‘atleri zımnında sûret-i hakdan gelerek nizâm ve kā‘idelerinden hâric olur olmaz mevâd için Bâb-ı Âlî ve sâir mahalleri ta‘cîz eylediklerinden başka mîrî anbârlarda nice meşakkatle vaz‘ olunan zahîreyi beğenmeyip şemâtet ve bahâne ile istedikleri gibi zahîre alıp bu vechile hasâret-i mal-ı mîrîye cesâret ettikleri âşikâr olmağla imdi fîmâ-ba‘d esnâf-ı mezkûreden sâbıkda ettikleri misillü Devlet-i aliyyenin hezâr tekellüfle cem‘ ve iddihâr ettiği zahîreye bahâne bularak cânib-i mîrîye hasâreti mûcib hareket edenleri ve kethudâ ve nizâm ustalarını dinlemeyenleri olur ise erbâb-ı vukūf ma‘rifetleriyle lede’t-tahkīk tedîb olunacaklarını esnâf-ı mezkûrenin kethudâ ve nizâm ustalarına tenbîh ve te’kîde mübâderet eyleyeler deyü. Fî 19 B sene [12]23