İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 404 Hüküm no: 285 Orijinal metin no: [110a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve havalisindeki Hırvatların, suç işleyerek toplum düzenini bozmalarından dolayı memleketlerine yollanmaları; Fransa vatandaşı olanların ise Fransa Maslahatgüzarı marifetiyle Bosna üzerinden ülkelerine gönderilmeleri Hırvat fermânı. Bâ-sah. İstanbul Kādısı İzzetlü, Fazîletlü Efendi Hazretleri Bir müddetden beri Boğaziçi’nde mütekessir olan Hırvat makūlelerinin sirkat ve katl-i nüfûs misillü fezâyıhda etmedikleri harekât-ı nâ-marzıye kalmayıp tâife-i mezbûre birkaç sınıfdan ibâret olarak el-hâletü hâzihî bir takımı Fransa Devleti’ne tâbi‘ olmak hasebiyle mücrim ve müttehem zuhûrunda hangi takımdandır zâbitân fark ve temyîz edemediklerinden aralıkda töhmet-i sarîhası takrîbiyle zarûrî ahz olunanların içinde Fransa Devleti teba‘asından olan takımdan bulunduğu hâlde mu‘âmele-i nâ-şâyesteden nâşî güftügûyu mûcib olduğu zâhir ve teba‘a-i merkūmeden olmayan sunûf-ı sâire dahi ol takımdan olmak sûretiyle etvâr-ı şakāvetkârâneye cür’et ederek hangi takımdandır temyîz olunamaması cihetiyle icrâ-yı muktezâ-yı maslahat mümkün olamadığı bâhir olduğundan başka el-yevm Dersa‘âdet ve Üsküdar ve Galata ve Boğaziçi’nde vâki‘ bağ ve bahçelerde o makūle Hırvatlar katı vâfir terâküm edip cümlesi âdet-i me’lûfeleri üzere muhîll-i nizâm-ı mülk hâlât-ı rediyyeye mütecâsir olduklarından bunlar külliyen def‘ olunmadıkdan sonra emniyet ve istirâhat mümkün olamayacağı kazâyâ-yı müsellemeden ve işbu Hırvatların şenâyi‘-i müstemirreleri Devlet-i aliyye-i ebed-karâr ile Fransa Sefîri beyninde vukū‘-ı mübâhasât-i müte‘addideye bâ‘is bir hâlât-ı gayr-ı lâyıka olduğundan fîmâ-ba‘d ref‘ ve imhâsı lâzımeden olduğuna binâen tâife-i mezbûreden Karadağlı ve sâir mahâl re‘âyâsı [110b] cümleten diyârlarına tard ve irsâl olunmak üzere, Fransa Devleti’ne tâbi‘ olanların dahi zâhire ihrâcıyla Devlet-i müşârün-ileyhânın Âsitâne-i sa‘âdetde olan maslahat-güzârı ma‘rifetiyle onar on beşer yanlarına mübâşirler terfîkıyla sâlimen Bosna’ya irsâl birle ondan diyârlarına imrârları husûsu maslahat-güzâr-ı mûmâ-ileyh ile bi’l-muhâbere karâr-dâde olarak sagīr ve kebîr her kimin yanında olur ise olsun tâife-i mezbûreden birinin Dersa‘âdet’de ve havâlîsinde kalmaması husûsuna bu def‘a devletce irâde-i kātı‘a müte‘allik ve ol bâbda sarîhü’l-müfâd hatt-ı hümâyûn-ı übbehet-makrûn-ı hazret-i cihân-dârî sâdır olmakdan nâşî evvelâ ehl-i İslâmdan ve millet-i sâireden birisi fîmâ-ba‘d Hırvat gürûhundan birini istihdâm etmemek ve şimdiye dek istihdâm edenler de mersûmların şehriyeleri ve cihât-ı sâireden ne kadar alacakları var ise bi’t-tamam verip tard etmek ve bu bâbda hâtır ve gönüle bakılmayarak zikrolunan Hırvatların bir neferi kimesnenin yanında ihfâ olunmayıp cümleten zâhire ihrâc ve defteri takdîm olunmak ve bunlardan Fransa Devleti’ne tâbi‘ olanları ne mikdâr ise Devlet-i aliyye ile Devlet-i müşârün-ileyhâ beyninde olan hulûs ve musâfât merâsimine lâyık mu‘âmele ile teba‘a-i mersûme ahz olunup maslahat-güzâr-ı mûmâ-ileyhe teslîm için bilâ-tazyîk Bâb-ı Âlî’ye irsâl kılınmak üzere tanzîm kılınmağla imdi her hangi sınıfdan olur ise olsun zikrolunan Hırvat gürûhundan ferd-i sagīr ve kebîr kimesnenin yanında ve bağ ve bahçelerde bulunmayıp şehriye ve cihât-ı sâirden alacak ve verecekleri olanların bir ân akdem hesâblarını kat‘ ve bi’t-tamam edâ ve istifâ ile tard ve def‘ eylemelerini ve sınıf sınıf vilâyetlerine irsâl olunmak üzere tâife-i mezbûreden her sınıf başka başka defter olunup ismi ve sâkin olduğu mahalli beyânıyla defterleri Bâb-ı Âlî’ye takdîm olunarak tâife-i mezbûreden Fransa Devleti’ne tâbi‘ olanları ne mikdâr ise tahkīk ve zâhire ihrâc birle teba‘a-i merkūme dahi mu‘âmele-i lâyıka ile ahz ve Bâb-ı Âlî’ye irsâl olunmasını iktizâ edenlere muhkem tenbîh ve te’kîde mübâderet ve hilâfı vaz‘ ve hâlât vukū‘a gelmemesine gāyetle ihtimâm ve dikkat ve işbu nizâm fîmâ-ba‘d düstûrü’l-amel tutulup mugāyiri kimesneye hareket ettirilmemesine bezl-i makderet ve ba‘d-ezîn her ne mahâlde olur ise olsun bir neferi kalır ise muhîll-i nizâm olacağına mebnî zâbitân mu‘âteb ve alıkoyup istihdâm eden dahi mu‘âkab olacağını cümleye i‘lân ve işâ‘at ederek ona göre icrâ-yı muktezâ-yı irâde-i kat‘iyeye gayret eyleyesin deyü buyruldu. [Fî] 23 B sene [12]23