İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 406 Hüküm no: 286 Orijinal metin no: [111a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cebehane Ocağındaki büyük yangın tulumbalarının yağlanması için Kasapbaşı tarafından yüz otuz vakıyye don yağı satın alınması Cebehâne tulumbalarına verilen yağ fermânı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Cebehâne-i âmirem Ocağında mevcûd kebîr harîk tulumbaların yağlanması için sâbıkı üzere Kasabbaşı tarafında[n] yüz otuz vakıyye revgan-ı don i‘tâsını Ocağ-ı mezkûr Tulumbacıbaşısı Mahmud -zîde kadrühû- bâ-arzuhâl istid‘â etmekden nâşî Hazîne-i âmiremde mahfûz Başmuhâsebe defterlerine nazar olundukda bundan akdem iki yüz on dokuz senesinde zikrolunan tulumbaların mâlîdesi için hâssam Kasabbaşı tarafından ol mikdâr revgan-ı don verilmiş olduğu Başmuhâsebe’den ba‘de’l-ihrâc hâssam Kasabbaşısı Dergâh-ı mu‘allâm kapıcıbaşılarından iftihârü’l-emâcid ve’l-ekârim Mustafa -dâme mecduhû-dan iktizâsı isti‘lâm olundukda şiddet-i şitâ hasebiyle zebh olan ağnam-ı mîrîyyeden içyağı zuhûr etmediğini beyân ile sâbıkı vechile mezkûru’l-mikdâr don yağının mübâya‘a ve i‘tâsı için sen ki Kādî-ı mûmâ-ileyh[sin], sana havâle olunmasını i‘lâm etmekle mezkûru’l-mikdâr don yağını mübâya‘a ve Kasabbaşı-i mûmâ-ileyh[e] i‘tâsı bâbında iftihârü’l-ümerâi ve’l-ekâbir, müstecmi‘u cemî‘i’l-ma‘âlî ve’l-mefâhir, bi’l-fi‘il başdefterdârım Mehmed Emin Behic -dâme ulüvvuhû- telhîs etmekle imdi telhîsı mûcebince amel olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda sâdır olan emrim üzere amel edip dahi ber-vech-i muharrer Kasabbaşı-i mûmâ-ileyhin i‘lâmı mûcebince mezkûru’l-mikdâr don yağını mübâya‘a ve Kasabbaşı-i mûmâ-ileyhe i‘tâsı husûsuna mübâderet eyleyesiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâbi‘-aşer min-Cumâdelâhir sene selâse ve işrîn ve mieteyn ve elf.