İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 406 Hüküm no: 287 Orijinal metin no: [111a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki marangoz, sıvacı vs. inşaat işçilerinin, ekteki defterde kayıtlı olandan daha fazla günlük ücret istememeleri Amele fermânı. Bâ-sah. İstanbul Kādısı İzzetlü, Fazîletlü Efendi Hazretleri Dersa‘âdet’de gerek mîrî ve gerek sâir ebniyede istihdâm olunan neccâr ve sıvacı ve sâir esnâf-ı amelenin yevmiyeleri nizâmı sicill-i mahfûzda ve aklâmda ve mi‘mârlara mahsûs mazbatada mukayyed olup ale’d-devam icrâsı lâzımeden iken bir müddetden beri neccâr ve sıvacı ve kalemkâr ve nakkāş makūleleri nizâmları üzere verilen yevmiyeye kāni‘ olmayarak günden güne artırıp ashâb-ı ebniyeden bây u gedâ tahammül edemeyecek dereceye resîde olduğu ihbâr ve tahkīk olunmağla imdi Ser-mi‘mâr-ı hâssa ve sâir iktizâ edenler hazır oldukları hâlde esnâf-ı merkūmeden lâzım gelenler huzûrunuza celb ile mukaddem verilen yevmiye nizâmı düstûrü’l-amel tutularak hilâfı hareket tecvîz olunmaması husûsunu tenbîh ve te’kîd ve küfelâya rabt ile istihsâl-i hüsn-i zabt ve nizâmı emrine mübâderet eyleyesiz deyü. [Fî] 13 B sene [1]223 *** Âsitâne-i aliyyede mîrî ve gerek sâir ebniyede istihdâm olunan neccâr ve sıvacı ve nakkāş ve duvarcı ve sâir esnâf-ı amelenin yevmiyeleri nizâmı bundan akdemce tanzîm ve her birine i‘lân ve tenbîh olunmuş iken bir müddetden beri neccâr ve sıvacı ve kalemkâr ve nakkāş makūleleri nizâmları üzere verilen yevmiyeye kāni‘ olmayarak günden güne artırıp ashâb-ı ebniyeden bây u gedâ tahammül edemeyecek dereceye resîde olduğu ihbâr ve tahkīk olunduğuna mebnî kadîmi üzere tanzîm ve tenbîhi zımnında bu dâ‘îlerine hitâben beyâz üzerine şeref-yâfte-i sudûr olan fermân-ı âlîlerine imtisâlen Ser-mi‘mâr-ı hâssa Ağa kulları ve bi’l-cümle neccâr kalfaları ve sıvacı ve nakkāş ve duvarcı ve sâir esnâf-ı amelenin yiğitbaşıları [111b] ve ustaları ve koltuk kalfaları nezd-i çâkerîye celb ile şeref-yâfte-i sudûr olan fermân-ı âlî muvâcehelerinde feth ve kırâet ve mazmûn-ı itâ‘at-makrûn kendilere tefhîm ve işâ‘at ve sicill-i mahfûzda mazbût kadîm yevmiyeleri ifâde ve tenbîh ile el-hâletü hâzihî vakt ü hâle nazaran her bir sınıfa lâyıkı vechile takdîr olunmuş olan fiyât-ı mevzû‘a defteridir ki ber-vech-i âtî zikrolunur. Fî 17 Receb sene [1]223 *** Amele defteri. Neccâr kalfası fî: 300 Kârhânecisi fî: 300 Üstâd silici fî: 240 A‘lâ neccâr fî: 240 Vasat neccâr fî: 210 Bayağı neccâr fî: 180 Usta marangoz fî: 210 Neccâr şâkirdi fî: 120 Sıvacı işcibaşısı fî: 300 Üstâd kalemkâr sıvacı fî: 270 Bayağı kalemkâr sıvacı fî: 240 A‘lâ sâdekâr sıvacı fî: 210 Bayağı sâdekâr sıvacı fî: 180 Sıvacı şâkirdi fî: 120 Ser-nakkāşân fî: 300 Üstâd kalemkâr nakkāş fî: 270 Bayağı kalemkâr nakkāş fî: 240 Sâdekâr nakkāş fî: 180 Nakkāş şâkirdi fî: 120 Üstâd camcı fî: 180 Camcı şâkirdi fî: 120 Üstâd suyolcu fî: 180 Löküncü fî: 150 Suyolcu şâkirdi fî: 120 Bıçkıcı fî: 150 Taşcı kârhânecisi fî: 240 Üstâd taşcı fî: 210 Vasat taşcı fî: 180 Şâkirdi fî: 120 Hammâmcı kârhânecisi fî: 225 Üstâd hammâmcı fî: 195 Hammâmcı şâkirdi fî: 120 Kurşuncu ustası fî: 180 A‘lâ oymacı fî: 240 Vasat oymacı fî: 210 Oymacı şâkirdi fî: 120 Doğramacı ve kafesci ve sandıkcı fî: 180 Koğacı fî: 180 Duvarcı kalfası fî: 210 Üstâd duvarcı fî: 180 Vasat duvarcı fî: 165 Tekneciyân fî: 75 Lağımcı iş[ci]başısı fî: 180 Lağımcı ustası fî: 150 Kaldırımcı fî: 150 Hammâlbaşı fî: 120 Irgādbaşı fî: 120 Hammâl-ı bennâ fî: 105 Rençberân: Harckârî fî: 100, bayağı fî: 90, tekneci fî: 75 Sâde tuğla dökücü: keyl: 1 kıyye, fî: 7 Tolos dökücü: keyl: 1 aded, fî: 5 Ketân kıyması: 1 kıyye, fî: 2 Amele-i merkūmenin ücretleri minvâl-i meşrûh üzere tanzîm ve küfelâya rabt olunup fiyât-ı mezkûre üzere amel ve hareket eylemeleri için erbâbına tenbîh olunmuşdur.