İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 411 Hüküm no: 291 Orijinal metin no: [112a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daha önce ferman gereğince kapatılmış olan Hasköy’de Humbarahane Kışlası yakınındaki francalacı fırınının yeniden açılması için verilen suret Berây-ı küşâd-ı fırın-ı francalacı der-kurb-i Kışlak-ı Humbarahâne der-Hasköy an-Vakf-ı İmâret-i âmire-i merhûme Vâlide-i Hudâvendigâr-ı esbak Sultân Selim Han der-kurb-i Ebî Eyyûb el-Ensârî ki, pîş ez-în fırın-ı mezkûr sedd ü bend şüde bûd kādı be-vakf-ı mezbûr gadr bûde ve bâ-irâde-i aliyye fırın-ı mezkûr kemâ-kân küşâd şüde sûret dâde fermûde el-vâki‘ der-sene 1223 ber-mûceb-i arzuhâl-i Yorgi zimmî mutasarrıf-ı fırın-ı mezkûr ve memhûr i‘lâm-ı Mehmed Tahir Efendi Kādı-ı İstanbul ve fermân-ı âlî fî 9 Şa‘bân sene 1223 ve bâ-fermân-ı şerîf. Hasköy’de Humbarahâne Kışlası kurbünde francalacı fırını 1 aded *** Hasköy’de Humbarahâne Kışlası’nda francalacı fırını. Hudâvendigâr-ı esbak cennet-mekân Sultân Selim Han -tâbe serâh-ün Vâlideleri merhûmun Eyüb-i Ensârî’de vâki‘ İmâret-i âmireleri evkāfından Hasköy’de Humbaracı Kışlası’nda bir bâb francalacı fırınının küşâdına dâir mutasarrıfı Yorgi zimmînin takdîm eylediği arzuhâli mefhûmunda zikrolunan fırının küşâdı i‘lâm olunması [112b] husûsunu İstanbul Kādısı Mehmed Tahir -zîde fazluhû-dan isti‘lâm olundukda, bundan akdem İstanbul ve havâlîsinde mahâll-i ma‘lûmede yedi aded francalacı fırınları ibkā ve mâ‘adâsı bâ-irâde-i aliyye sedd ü bend olunmuş iken bundan akdemce Hudâvendigâr-ı esbak cennet-mekân Sultân Abdülhamid Han -tâbe serâhun[un] vâlidelerinin Beylerbeyi ve Mîrgûne nâm mahallerde müceddeden ihyâsına muvaffak oldukları cevâmi‘-i şerîfe ve âsâr-ı celîleleri evkāfından mahalleyn-i merkūmeynde iki aded ve Gümrükcü Çiftliği’nde bir ve Çelebi Hasan Paşa Vakfı’ndan Kumkapı hâricinde bir ve Kethudâ-yı Sadr-ı Âlî-i esbak İbrahim Efendi merhûmun mahdûmunun Tavuk Pazarı nâm mahâlde bir ve Beykoz civârında Kâğıthane nâm mahâlde bir ve İstanbul’da Şehremîni nâm mahâlde bir cem‘an yedi aded francalacı fırınlarının küşâdıyla on dört adede iblâğı husûsuna irâde-i aliyye ta‘alluk eylediğine binâen bâ-fermân-ı âlî küşâdlarına ruhsat verilmiş olup işbu küşâdı istid‘â olunan fırın-ı mezkûr mesdûd olan fırınlara dâhil olup lâkin fırın-ı merkūm Hudâvendigâr-ı esbak cennet-mekân Sultân Selim Han -tâbe serâh-ün vâlideleri merhûmun Eyüb-i Ensârî’de vâki‘ imâret-i âmire ve hayrât-ı sâireleri evkāf-ı şerîfesi müsakkafâtından olmağla sıyâneten li’l-vakf fırın-ı mezkûrun küşâdını müşârün-ileyh memhûren i‘lâm etmeğin i‘lâmı mûcebince fırın-ı mezkûrun küşâdı için sûret verilmek bâbında fermân-ı âlî sâdır olmağın mûcebince fırın-ı mezkûrun küşâdı için işbu sûret verildi. Fî 16 Ş sene 1223