İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 412 Hüküm no: 293 Orijinal metin no: [112b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Kadısı’na kumaş narhı tespit etmesi için emir Akmişe narh[ı] için emir. Bâ-sah. İstanbul Kādısı İzzetlü, Fazîletlü Efendi Hazretleri Der-aliyye’de nesc ve i‘mâl olunan çiçekli ve şâlî ve alacayı bezzâzân esnâfı diledikleri gibi gālî bahâ ile ibâdullâha füruht eyledikleri ve bu husûsun ardı aranmadığından zikrolunan akmişenin bahâsı günden güne tezâyüd bulmakda olduğundan gayri fesci ve haffâf esnâfı ve sâir esnâf dahi birbirlerine bakarak istedikleri vechile emti‘a ve eşyâlarını ibâdullâha bey‘ ile ızrâr-ı ibâdı mûcib harekâta ictisâr eyledikleri ma‘lûm olan hâlâtdan olduğuna binâen esnâf-ı merkūmenin emti‘a ve eşyâları kendilere kaça olur ve ne mikdâr kâr ile füruht eylemeleri kendilere elverir, etrâfıyla tahkīk olunup taht-ı râbıtaya idhâl olunması husûsuna irâde-i kerâmet-ifâde-i şâhâne ta‘alluk etmekden nâşî ber-mantûk-ı irâde-i seniyye husûs-ı mezbûru lede’t-tahkīk râbıta-i kavîye bend ile ibâdullâhı himâye vâcibe-i hâlden olmağla imdi zikrolunan esnâfların kethudâlarını huzûrunuza celb ve her bir husûsu başka başka suâl ederek keyfiyeti gereği gibi tahkīk ve erbâb-ı vukūfdan dahi tashîh ettikden sonra emti‘a ve eşyâları kendilere ne vechile olur ve ne mikdâr kâr zammıyla ibâdullâha füruht elverir ve bundan sonra nizâmları ne gûne tutulmak iktizâ eder, etrâfıyla mülâhaza ederek sûret-i nizâm ve karârını bâ-takrîr huzûrumuza ifâdeye mübâderet eyleyesiz deyü. Fî 24 Ş [12]23