İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 413 Hüküm no: 294 Orijinal metin no: [112b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmek gramajının yeniden düşürülmesi ile ilgili kanun Nân-ı azîz tenzîli fermânı. Bâ-sah. İstanbul Kādısı İzzetlü, Fazîletlü Efendi Hazretleri Sekene-i Dârü’l-hilâfeti’l-aliyye’nin her hâlde tevsî‘-i dâire-i ma‘âşlarını müstelzim olur esbâbın istihsâline dikkat matlûb-ı âlî olduğundan bundan akdem nân-ı azîzin paralığına beşer dirhem zammolunmuş ise dahi el-hâletü hâzihî rûz-ı kasım takarrub edip [113a] Ramazan-ı şerîf gurresinden mübâşeret ile tevzî‘ verilecek olduğuna binâen narh-ı mezkûr vechile işlenildiği sûretde idâre etmeyip zarar ve hasârlarını müstelzim olacağı ekmekci esnâfının istid‘â ve ifâdelerinden müstebân ve fi’l-hakīka nümûne tutulup tevzî‘ zahîresinin narh-ı mezkûr üzere idâre etmeyeceği nümâyân olmağla siz dahi tahkīk ve tedkīk edip esnâf-ı merkūmenin zarar edecekleri ta‘ayyün eylediği sûretde Ramazan-ı şerîfde nân-ı azîzi gāyet hâs ve pişkin olarak tabh ve ibâdullâha füruht etmeleri şartıyla zamîme-i mezkûrenin tenzîliyle tanzîmine mübâderet eyleyesiz deyü. Fî 22 Ş sene [12]23