İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 413 Hüküm no: 295 Orijinal metin no: [113a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daha önce ferman gereğince kapatılmış olan Eyüp Kızılmescit’teki francalacı fırınının yeniden açılması için verilen suret Berây-ı izin ve ruhsat-ı küşâd kerd berây-ı tabh ve i‘mâl-i hâssu’l-hâs nân-ı francala der-fırın-ı Kızılmescid der-Eyyûb-i Ensârî der-uhde-i mesfûrîn bûd ve lâkin fırın-ı mezkûre bâ-hatt-ı hümâyûn-ı şevket-makrûn ve fermân-ı âlî sedd ü bend bûd ki pîş ez-în fırın-ı mezkûre küşâd-eş istid‘â-yı inâyet kerd ber-mûceb-i arzuhâl-i mesfûr ve bâ-i‘lâm-ı memhûr-ı Mehmed Tahir Efendi Kādî-ı İstanbul el-vâki‘ fî 22 Şa‘bân sene 1223 kayd şüd ve sûret dâde ber-mûceb-i fermân-ı âlî ve bâ-fermân-ı şerîf fî 25 Şa‘bân sene [1]223. Berây-ı fırın-ı francala der-Kızılmescid der-Eyyûb-i Ensârî der-uhde-i Asador zimmî Fırın: 1 aded *** Kızılmescid’de francalacı fırını. Vech-i meşrûh üzere İstanbul ve havâlîsinde mahâll-i ma‘lûmede yedi aded francalacı fırınları ibkā ve mâ‘adâsı bâ-irâde-i aliyye sedd ü bend olunduğu derkenârdan müstebân iken bundan akdemce Vâlide-i mâcid-i şehriyârî cennet-mekân, firdevs-âşiyân Sultân Abdülhamid Han -aleyhi’r-rahmetü ve’l-gufrân- hazretlerinin Beylerbeyi ve Mîrgûnoğlu nâm mahallerde müceddeden ihyâsına muvaffak oldukları cevâmi‘-i şerîfe ve âsâr-ı celîleleri evkāfından mahalleyn-i merkūmeynde iki aded ve Gümrükcü Çiftliği’nde bir aded ve Çelebi Hasan Paşa Vakfı’ndan Kumkapı hâricinde bir aded ve Kethudâ-yı Sadr-ı Âlî-i esbak İbrahim Efendi mahdûmunun Tavuk Pazarı nâm mahâlde bir aded ve Beykoz civârında Kâğıthane nâm mahâlde bir aded ve İstanbul’da Şehremîni nâm mahâlde bir aded ve Hudâvendigâr-ı esbak cennet-mekân, firdevs-âşiyân Sultân Selim Han hazretlerinin vâlideleri merhûme Mihrişah Vâlide Sultân -tâbe serâhâ- Vakfı müsakkafâtından Hasköy’de Humbaracı Kışlası civârında bir aded ki cem‘an sekiz aded francalacı fırınlarının küşâdıyla on beş adede iblâğı husûsuna irâde-i aliyye ta‘alluk eylediğine mebnî şeref-yâfte-i sudûr olan fermân-ı âlî-şân mûcebince küşâdlarına ruhsat verilmiş olup ve işbu küşâdı istid‘â olunan Eyüb-i Ensârî’de Kızılmescid nâm mahâlde kâin francalacı fırını dahi mukaddemâ bâ-irâde-i aliyye mesdûd olan fırınlara dâhil olup lâkin fırın-ı merkūm mutasarrıfları şâyân-ı inâyet olmağla zikrolunan fırının merhameten küşâdı husûsunu İstanbul Kādısı fazîletlü Mehmed Tahir Efendi hazretleri memhûren i‘lâm etmeleriyle, i‘lâmı mûcebince küşâdı için mahâlline kaydolunup sûreti verile deyü fermân-ı âlî ve fermân-ı şerîf sudûr olmağın mûcebince mahâlline kaydolunup fırın-ı mezkûrda külle yevm nân-ı azîz-i hâssu’l-hâs tabh ve i‘mâl eylemek için izin ve ruhsatı hâvî küşâdı için mesfûr yedine Mevkūfât’dan işbu sûret verildi. Fî 25 Ş sene 1223