İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 419 Hüküm no: 300 Orijinal metin no: [114b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki kasapların koyun etini yeni belirlenen 24 paradan satmaları 24 paraya lahm-ı ganem narhı fermânı. Bâ-sah. İstanbul Kādısı İzzetlü, Fazîletlü Efendi Hazretleri Sekene-i Dârü’l-hilâfeti’l-aliyye’nin havâic-i zarûriyelerinden olan kâffe-i zehâirin tedârükü husûsunda zarûretden vikāyet ve fiyât maddesine dahi dikkat birle ibâdullâhın âsâyiş ve refâh ( ) ve tevsî‘-i dâire-i ma‘âşları esbâbını istihsâl akdem-i matlûb ve âmâlimiz olmakdan nâşî bundan akdem kasab esnâfı lahm-ı ganemin kıyyesini yirmi ikişer para hesâbıyla alıp yirmi beşer paraya ibâdullâha füruht etmek üzere narh verilmiş ise dahi el-hâletü hâzihî Anadolu cânibinden gelen ağnamdan mâ‘adâ ma‘rifetimiz ile hıtta-i Rumeli’den külliyetlü ağnam tevârüd etmekde olup bu makūle erzâk ve zehâirin avn ü inâyet-i Bârî ile kesret üzere celbi husûsunu istihsâl ibâdullâhın muzâyakadan vâreste olmaları matlûbuna mebnî olmağın fiyâtının tenkīsı ile dahi sıyânet-i sekene-i saltanat-ı seniyyeye dikkat lâzımeden olduğuna binâen kasab esnâfı iki para kâra kanâ‘at edip lahmın kıyyesini ibâdullâha yirmi dörder paraya satmak üzere esnâf-ı merkūme bi’r-rızâ râbıta verilmiş olmağla siz dahi kasab ustalarını celb ile fîmâ-ba‘d lahmı yirmi ikişer paraya alıp ikişer para kârıyla yirmi dördere ibâdullâha füruht eylemelerini tenbîh ve te’kîde ve eğer hilâf-ı tenbîh harekete mücâseret ederi tahkīk olunur ise vebâlleri boynuna o makūlelerin derhâl tarafımızdan tertîb-i cezâlarına ibtidâr olunacağını beyân ve tefhîme mübâderet edip siz dahi ale’d-devam nezâret ve dikkat eyleyesiz deyü. Fî 14 N sene [12]23