İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 422 Hüküm no: 302 Orijinal metin no: [115b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daha önce ferman gereğince kapatılmış olan Langa Yenikapısı dışındaki francalacı fırınının yeniden açılmasına izin verildiği Langa Yenikapısı hâricinde francalacı fırını küşâdı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki İstanbul ve havâlîsinde mahâll-i ma‘lûmede yedi aded francalacı fırınları ibkā ve mâ‘adâsı bâ-irâde-i aliyyem mukaddemâ sedd ü bend olmakdan nâşî bundan akdem peder-i vâlâ-güherim merhûm ve mağfûrun-leh Sultân Abdülhamid Han -tâbe serâh-ün Beylerbeyi ve Mîrgûnoğlu nâm mahallerde müceddeden binâsına muvaffak oldukları cevâmi‘-i şerîfe ve âsâr-ı celîlesi evkāfından mahalleyn-i merkūmeynde iki aded ve Gümrükcü Çiftliği’nde bir aded ve Çelebi Hasan Paşa Vakfı’ndan Kumkapı hâricinde bir aded ve Tavuk Pazarı’nda bir aded ve Beykoz civârında Kâğıthane nâm mahâlde bir aded ve İstanbul’da Şehremîni nâm mahâlde bir aded ve Hasköy’de Humbarahâne Kışlası civârında bir aded ve medîne-i merkūmede Kızılmescid nâm mahâlde bir aded ve İncirli Çiftliği’nde bir aded ve Galata’da Kireçkapısı dâhilinde bir aded ve Üsküdar’da İmrahor’da bir aded ve Arnavut karyesinde bir aded ve Beşiktaş’ta bir aded ki cem‘an on dört aded francalacı fırınlarının küşâdlarıyla yirmi bir adede iblâğ olunması husûsuna irâde-i seniyye ta‘alluk eylediğine binâen küşâdlarına ruhsat verilmiş olmakdan nâşî İstanbul’da Langa Yenikapısı hâricinde kâin francalacı fırını dahi mukaddemâ bâ-irâde-i aliyyem mesdûd olan fırınlara dâhil olup lâkin fırın-ı mezkûr Hudâvendigâr-ı esbak merhûm Sultân Mustafa Han -tâbe serâh-ün Evkāf-ı şerîfesi müsakkafâtından olmağla sıyâneten li’l-vakf emsâline kıyâsen fırın-ı mezkûrun küşâdı için ruhsatı hâvî emr-i âlî-şânım sudûrunu sen ki mevlânâ-yı mûmâ-ileyhsin, memhûren i‘lâm eylediğin ecilden imdi i‘lâmın mûcebince amel olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda sâdır olan emrim üzere amel edip dahi i‘lâmın mûcebince fırın-ı mezkûrun küşâdı için ruhsatı hâvî şeref-yâfte-i sudûr olan işbu emr-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi birle âmil olup hilâfına bir türlü rızâ ve cevâz göstermeyesin. Şöyle bilesin alâmet-i şerîfe i‘timâd kılasın. Fi’l-yevmi’s-sânî ve’l-işrîn min-Ramazani’l-mübârek li-sene selâse ve işrîn ve mieteyn ve elf.