İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 428 Hüküm no: 311 Orijinal metin no: [116b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpekçi esnafına, Mîzân-ı Harir Mukataası rüsûmâtını ödemeleri hususunda tembihte bulunulması Mîzân-ı Harîr rüsûmuna dâir emir. Bâ-sah. İstanbul Kādısı İzzetlü, Fazîletlü Efendi Hazretleri Tersâne-i âmire Hazînesi’ne merbût Harîr Rüsûmu Mukāta‘ası’nın iktizâ eden rüsûm-ı mîrîyyesi hîn-i nizâmından beri şurûtu mûcebince ahz ve tahsîl olunur iken bu esnâda ipekci esnâfından ba‘zı kimesneler rüsûmât-ı mezkûreyi edâdan imtinâ‘ etmekde oldukları inhâ ve ihbâr olunup Mîzân-ı Harîr Rüsûmu Mukāta‘ası Tersâne-i âmirenin vâridât-ı cesîmesinden olmağın esnâf-ı merkūmenin rüsûm-ı mezkûreyi edâda bu vechile te‘allül ve muhâlefet eylemeleri mugāyir-i rızâ-yı âlî olmağla esnâf-ı merkūmenin kethudâ ve yiğitbaşılarını ve sâir celbi muktezî olanları huzûrunuza ihzâr ile üzerlerine edâsı lâzım gelen rüsûmâtı bilâ-te‘allül Tersâne-i âmire tarafından ta‘yîn olunan Harîr emînine edâ ve teslîm eylemelerini merkūmlara muhkem tenbîh ve te’kîde mübâderet ve fîmâ-ba‘d rüsûm-ı mezkûreyi edâda esnâf-ı merkūme tarafından muhâlefet vukū‘a gelmemesi râbıtasını istihsâle himmet eyleyeler deyü. Fî 2 Za sene [12]23