İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 431 Hüküm no: 313 Orijinal metin no: [117b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da üretilip satılan çeşitli cins kumaşlar ve yiyecek maddeleri için belirlenen narh Sandalcılara dâir emir. Bâ-sah. İstanbul Kādısı İzzetlü, Fazîletlü Efendi Hazretleri Âsitâne-i sa‘âdetde nesc ve i‘mâl ile ibâdullâha füruht olunan akmişenin bahâları gālî ve müşterilerine hasârı zâhir olduğundan esnâf ve müşterilerine zarar ve hasârı mûcib olmamak üzere hüsn-i kalıba ifrâğıyla tanzîmi bâbında mukaddem sünûh eden irâde-i seniyye-i şâhâne bâ-fermân-ı âlî tarafınıza ifâde ve tefhîm olunmağla mûcebince esnâf kethudâları ve nizâm ustaları huzûrunuza celb ve ihzâr ile Âsitâne-i aliyyede nesc ve i‘mâl ve bey‘ u şirâ olunan akmişe makūlesinin sermâyelerini tahkīk ve kârlarını zammederek her birinin kıymet ve bahâlarını bi’t-terâzî takdîr ve takvîm birle tanzîm ve akmişe-i mezbûrenin nevi‘ ve cins ve bahâlarını müfredât üzere terkīm ederek takdîr olunan kıymet ve bahâlarıyla bey‘ u şirâ olunmasına ta‘ahhüd eylediklerini mübeyyin bir kıt‘a memhûr takrîriniz tarafımızdan bâ-takrîr Rikâb-ı kâm-yâb-ı cenâb-ı Hilâfet-penâhî’ye arz olundukda “Tertîb olunduğu üzere bey‘ u şirâ oluna ve sâir ekl ü şurba müte‘allik olan eşyâya dahi narh verilip ibâdullâha zahmet çektirmemeğe dikkat kılına” deyü hatt-ı hümâyûn-ı adâlet-makrûn-ı şâhâne şeref-bahş-ı sudûr olmağla mûceb ü muktezâsının icrâsına tarafımızdan dahi sarf-ı himmet ve ikdâm-ı mâlâ-kelâm olunacağı vâreste-i kayd ve ifhâm olduğuna binâen imdi gerek akmişe makūlesinin tertîb olunduğu ve bi’l-ittifâk ta‘ahhüd ile narh verildiği üzere bey‘ u şirâ ettirilmesine ve me’kûlât ve meşrûbât ve ibâdullâhın mâ-bihi’l-ihtiyâcâtı olan eşyâya dahi lâyıkı vechile narh verip bilâ-zarûret bey‘ u füruht ettirilmesiyle Dârü’s-saltanati’s-seniyye sekenesinin zahmet çekmemeleri ve râhatları esbâbının istihsâline bezl-i cüll-i himmet ve mezîd i‘tinâ ve dikkat eyleyeler deyü. Fî 13 Za sene [12]23