İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 432 Hüküm no: 314 Orijinal metin no: [117b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu vb. esnafın dükkânlarındaki küfecilerin emirde belirtilen esaslar çerçevesinde kefil ve nizama bağlanması ve nizamın bir suretinin huzura arz edilmesi Küfecilere dâir emir. Bâ-sah. İstanbul Kādısı İzzetlü, Fazîletlü Efendi Hazretleri Öteden beri sabuncu ve ona mümâsil esnâfın dükkânlarında birer küfecileri olup onlar dahi kefîllü olduğundan dükkânlarından aldıkları <<üzere>> erzâkı Der-aliyye’de sâkin ibâdullâha bey‘le me’lûf iken bu esnâda küfeci esnâfı kesret bulup her bir dükkânda üçer beşer küfeci olduğundan diledikleri gibi dükkânlardan zehâir ahz edip iki üç kat bahâ ile Der-aliyye sekenesine mahsûs olan erzâkı taşra ve ecnebiye füruht etmeği âdet edinmiş olduklarından sabuncu küfecilerinden biri geçen gün sabun kaçırır iken tutulduğundan küreğe vaz‘ olunmuş ise de bu husûs umûr-ı nizâmiyeden olduğundan kemâl-i dikkat-i lâzımeden olmağla imdi iktizâ edenleri huzûrunuza celb birle her bir dükkânda bir küfeci olup onun dahi kefîli olarak fîmâ-ba‘d içlerinden biri bu makūle harekete cesâret etmemek ve ederi olur da tutulur ise ol zaman yalnız kendisi tedîb olmayıp kefîli dahi beraberce küreğe vaz‘ olunmak üzere cümlesini kefîle rabt ile nizâm-ı kavîye bende mübâderet ve sûret-i nizâmını huzûrumuza i‘lâma mübâderet eyleyeler deyü. Fî 29 L. sene [12]23