İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 432 Hüküm no: 315 Orijinal metin no: [117b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daha önce ferman gereğince kapatılmış olan Kasımpaşa’daki francalacı fırınının yeniden açılmasına izin verildiği Kasımpaşa’da francalacı fırını küşâdı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Bundan akdem İstanbul ve havâlîsinde ve mahâll-i ma‘lûmede yedi aded francala fırınları ibkā ve mâ‘adâsı bâ-irâde-i aliyye sedd ü bend olunmuş olup ba‘dehû Vâlid-i mâcidim cennet-mekân, firdevs-âşiyân merhûm ve mağfûrun-leh Sultân Abdülhamid Han -tâbe serâh-ün Beylerbeyi ve Mîrgûnoğlu nâm mahallerde müceddeden binâ ve inşâsına muvaffak olduğu cevâmi‘-i şerîf[e] ve âsâr-ı celîlesi evkāfından mahalleteyn-i merkūmeteynde iki aded ve Gümrükcü Çiftliği nâm mahâlde ve Kumkapı hâricinde ve Tavuk Pazarı’nda ve Beykoz civârında Kâğıthane nâm mevzi‘de ve Eyüp ve Hasköy ve mahâll-i sâirede mesdûd olan francalacı fırınları bâ-irâde-i seniyye şeref-yâfte-i sudûr olan evâmir-i şerîfem mûceblerince küşâdlarına ruhsat verilmiş olup işbu küşâdı istid‘â olunan kasaba-i Kasımpaşa’da kâin sekiz horoslu bir bâb francalacı fırını dahi mukaddemâ bâ-irâde-i seniyye mesdûd olan fırınlara dâhil olup lâkin fırın-ı mezkûr Sadrazam-ı esbak Gāzi Hasan Paşa’nın kasaba-i mezbûrede binâ eylediği Kalyoncu Kışlası derûnunda Câmi‘-i şerîf ve mekteb-i münîf ve çeşme-i latîf ve hayrât-ı sâiresi evkāfı müstegallâtından olup bâ-husûs fırın-ı mezbûre mutasarrıfları yedi nefer yetîm ve yetîmelerin olmağla vakf-ı şerîf-i mezkûru sıyâneten ve gerek mutasarrıfları [118a] olan eytâm-ı merkūmenin hâllerine merhameten emsâline kıyâsen küşâdı için ruhsatı hâvî emr-i şerîf-i âlî-şânım i‘tâsını sen ki mevlânâ-yı mûmâ-ileyhsin, memhûren i‘lâm eylediğin ecilden imdi i‘lâmın mûcebince küşâdına ruhsatı hâvî fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda fırın-ı mezkûrun küşâdı için ruhsatı hâvî şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi birle âmil olup hilâfına bir türlü rızâ ve cevâz göstermeyesin. Şöyle bilesin alâmet-i şerîfe i‘timâd kılasın. Tahrîren fi’l-yevmi’s-sâmin [ve’l]-işrîn [min]-Zilka‘de sene selâse [ve] işrîn ve mieteyn ve elf. Kostantıniyye-i mahrûse