İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 433 Hüküm no: 316 Orijinal metin no: [118a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artan sahtiyân ve mamül ayakkabı fiyatlarına çekidüzen vermekle görevlendirilen eski Çavuşbaşı Ahmed’e İstanbul Kadısı’nın da yardımcı olması Haffâfân esnâfına müte‘allik emr-i âlî. Bâ-sah. İstanbul Kādısı İzzetlü, Fazîletlü Efendi Hazretleri Bir müddetden beri mest ve pâpûş ve çizme ve eşyâ-yı sâire-i haffâfiyyenin bahâsı hadd-i i‘tidâli tecâvüz ile fâhiş olup bu keyfiyet Âsitâne-i sa‘âdetde olan ibâdullâhın beyhûde mazarrât ve hasâretlerine bâdî olduğundan mukaddem bu husûs zımnında müekked emr-i hümâyûn-ı cenâb-ı Hilâfet-penâhî dahi şeref-yâfte-i sudûr olarak husûs-ı mezbûrun bir taht-ı râbıtaya bend ve idhâli matlûb-ı kat‘î-i mülûkâne olmak ve Kayseri’de birkaç nefer kimesneler sahtiyân ticâret ve kârını kendilere hasr u kasr ile zikrolunan haffâf eşyâsı bahâsının terakkī ve galâsına bâ‘is oldukları istimâ‘ olunmak cihetleriyle husûs-ı mezbûra ricâl-i Devlet-i aliyyeden bir zâtın dahi nezâret ve teşrîki lâzım geldiğinden Çavuşbaşı-i esbak Ahmed Beyefendi me’mûr kılınıp cenâbınız ile muhâbere ve müzâkere ve sâir erbâb-ı vukūfdan dahi suâl ve tahkīk-ı madde ederek ve taşradan gelen sahtiyân ve dikilmiş eşyâ-yı haffâfiyyenin fiyâtına bakarak hadd-i lâyık ve i‘tidâli üzere râbıta-i hasene tahtına rabt ve idhâline ihtimâm ve dikkat eylemesi için me’mûriyetini hâvî mahsûs kendine fermân-ı âlî irsâl olunmağla imdi siz dahi Mîr-i mûmâ-ileyh ile buna dâir iktizâ eden keyfiyât ve ahvâli söyleşip ona göre emr-i nizâmına bi’l-ittifâk mübâderet ve dikkat ve hüsn-i râbıta tahtına idhâliyle taraf-ı hazret-i zıllullâhîye isticlâb-ı da‘avât-ı hayriyeye i‘tinâ ve himmet eyleyeler deyü. Fî 17 Z sene [12]23