İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 434 Hüküm no: 317 Orijinal metin no: [118a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akdeniz’den İstanbul’a mal getiren gemilerin İstanbul İhtisab Mukataası için ödemeleri gereken gemi rüsumatının, yükümlülerinden mutlaka tahsil ettirilmesi İstanbul ve Tevâbi‘i İhtisâb Mukāta‘ası’na dâir fermân. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- ve iftihârü’l-ümerâi ve’l-ekâbir, müstecmi‘u cemî‘i’l-ma‘âlî ve’l-mefâhir, el-muhtassu bi-mezîd-i inâyeti’l-Meliki’l-kādir Dergâh-ı mu‘allâm Yeniçerileri Ağası ( ) -dâme ulüvvuhû- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim hâssam Bostancıbaşısı ( ) -dâme mecduhû- tevkī‘-i refî‘-i hümâyûn vâsıl olucak ma‘lûm ola ki Darbhâne-i âmirem tarafından zabt ve idâre olunan mukāta‘atdan İhtisâb-ı İstanbul ve Tevâbi‘i Mukāta‘ası’nı iki yüz yirmi üç senesi Mart’ı ibtidâsından Şubat’ı gāyetine değin yed-i vâhidden zabt ve idâre eylemek üzere Seyyid Mustafa -zîde kadrühû-ya ber-vech-i emânet ihâle olunmuş olup lâkin mukāta‘a-i mezbûrun ekser-i hâsılâtı Bahr-i Sefîd’den Âsitâne-i aliyyeme vürûd eden sefînelerden kadîmden beri alınıgelen rüsûmât-ı sefâine münhasır iken bir iki mâhdan beri sefâin rüesâları kadîme mugāyir hareket ile mu‘ayyen olan rüsûmât-ı sefâinlerini edâda muhâlefet eylediklerinden vâridât-ı mukāta‘anın kesr ü tedennîsine bâ‘is ü bâdî olduklarını beyân birle o makūle vürûd eden sefînelerin ber-mu‘tâd-ı kadîm rüsûmât-ı sefâinleri îcâb ve iktizâ edenlerden cem‘ ve tahsîl ettirilmek üzere merkūm bir kıt‘a emr-i şerîfim sudûru niyâzında olduğun ricâl-i Devlet-i aliyyemden hâlâ Darbhâne-i âmirem nâzırı iftihârü’l-emâcid ve’l-ekârim Ahmed Şâkir -dâme mecduhû- bâ-takrîr inhâ etmekle Hazîne-i âmirem defterlerine mürâca‘at olundukda İstanbul’dan Eyüp ve Hasköy’e varınca vâki‘ olan iskelelere envâ‘-ı metâ‘ getiren sefâin rüsûmâtı İstanbul İhtisâbı Mukāta‘ası’na ber-mûceb-i defter-i tahrîr hâsıl kaydolunmağla yedine verilen sûret-i defter mûcebince kadîmden alınageldiği üzere rüsûmât-ı sefâinleri ahz ü kabz ettirilmek şurûtundan idiği kuyûddan müstebân olmağla imdi şurûtu mûcebince amel olunmak fermânım olmuşdur. Buyurdum ki: Hükm-i şerîfim vardıkda bu bâbda sâdır olan emrim üzere amel edip dahi siz ki mevlânâ ve Yeniçeri ağası ve bostancıbaşı-i mûmâ-ileyhimsiz, ber-vech-i muharrer nâzır-ı mûmâ-ileyhin inhâsı üzere amel ve hareket birle zikrolunan iskelelere envâ‘-ı metâ‘ getiren sefâinden ber-mûceb-i defter-i tahrîr hâsıl kaydolunan rüsûmât-ı sefâin kadîmden beri ne vechile ahz ü kabz olunagelmiş ise sene-i merkūmeye mahsûben yine ol vechile cem‘ ü tahsîl ettirtip hilâf-ı şurût ve mugāyir-i emr-i âlî-şânım te‘allül ve muhâlefet ile ızâ‘at-i mal-ı mîrî ettirmeyesiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis [min]-Muharrem sene erba‘a [ve] işrîn ve mieteyn ve elf. Kostantıniyye-i mahrûse