İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 443 Hüküm no: 324 Orijinal metin no: [120b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul kazasının 1224 senesi avarız vergisinin toplanması Avârız emri. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Hazîne-i âmirem defterleri mûcebince İstanbul kazâsının iki bin yedi yüz bir buçuk ve bir sülüs avârız hânesi olup bin iki yüz yirmi dört senesine mahsûb olmak üzere cem‘ ve tahsîli lâzım gelmeğin [( )] der-uhde olunup yedine [verilen] mühürlü ve nişânlu Mevkūfât defteri sûreti mûcebince cem‘ ve tahsîl ettirilmek fermânım olmuşdur. Buyurdum ki: Hükm-i şerîfimle mübâşir vardıkda bu bâbda sâdır olan emrim üzere amel edip dahi sene-i mezbûra mahsûben kazâ-i mezbûrun ol mikdâr avârız hânesi olup Tersâne-i âmirem ocaklığı olmağla beher hânesinden dörder yüz yirmi dokuzar akçe kürekci bedellerin irsâl olunan mühürlü ve nişânlu Mevkūfât defteri sûreti mûcebince vakt ü zamanıyla yerlü yerinden cem‘ ve tahsîl ve dâhil-i Tersâne-i âmirem ettirtip hilâf-ı emir ve defter kimesneye te‘allül ve muhâlefet ettirmeyesin ve bundan mâ‘adâ mübâşir-i merkūmun cihet-i ma‘âşı için her bir avârız hânesinden onar akçe vech-i ma‘âş ve on beşer akçe harc-ı Tersâne-i âmirem için aldırılıp ve avârız için alınan akçenin her yüz on akçesinden bir esedî guruş tahsîl olunup ve hîn-i tahsîlde mîrî için alınan akçeyi Hazîne-i âmireme alındığı vech üzere aldırtıp bundan ziyâde ve noksan alınmaya ve aldırmayasın. Kesr-i defterden ve naks-ı hâneden ve fermânımdan ziyâde mutâlebesiyle zulm ü te‘addîden gāyetü’l-gāye hazer ve mücânebet eyleyesin. Şöyle bilesin alâmet-i şerîfe i‘timâd kılasın. Tahr( ). Kad vasale ileynâ fî 21 S sene [1]224