İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 444 Hüküm no: 325 Orijinal metin no: [120b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gayrimüslimlerin, paskalya günlerinde Müslümanlara mahsus elbiseler giyip çarşı ve pazarda gezmemeleri, eğlence meclisi tertip etmemeleri Keferelerin paskalyasına müte‘allik yasak. Bâ-sah. İstanbul Kādısı Fazîletlü Efendi Makarr-ı Hilâfet-i hazret-i cihân-bânî olan Âsitâne-i devlet-âşiyâne ve havâlîsinde ba‘zı mahallerde tâife-i Nasârânın beyza-i sürh ve paskalya ta‘bîr ettikleri bed-nâmları vâki‘ oldukları günlerde ehl-i İslâma mahsûs elbise-i fâhire ile esvâk ve pazarda geşt ü güzâr ve ikāmet ve münâfî-i tavr-ı edeb savt-ı bülend ve sâz ü tarab ile akd-i encümen-i münker eylemelerinin men‘ u def‘i mühim ve muktezî olmağla imdi Âsitâne ve havâlîsinde olan tâife-i Rûmiyân ve Ermeniyânın bed-nâmları vâki‘ olduğu eyyâm-ı ma‘dûdede kendi ırzları ve siyâb-ı mahsûsalarıyla geşt ü güzâr ve etvâr-ı gayr-ı marzıyeden ihtirâz edip münâfî-i tavr-ı edeb savt-ı bülend ve sâz ü tarab ile akd-i encümen-i girye eylemeden mübâ‘adet ve ictinâb eylemek ve mukaddemâ bâ-fermân-ı âlî men‘ ve zecr olundukları kebîr kalpak ve elbise-i sâireyi iktisâ ve birbirleriyle mücâdele ve münâkaşa eylememek üzere tehdîd eylemeleri için tenbîhi lâzım gelenlere ve Rum ve Ermeni patriklerine tenbîh-i ekîd eyleyip ve siz dahi bu husûsa nezâret eyleyesiz deyü. Fî 21 S sene [12]24