İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 449 Hüküm no: 330 Orijinal metin no: [122a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasapların Tersane ve Cebehane’ye ödedikleri paradan dolayı koyunların fiyatına kıyye başına yapılmakta olan 2 paralık zammın 3 paraya çıkarılması Berây-ı sûret dâde be-yed-i esnâf-ı kassâbân-ı ganem ez-ân sebeb ki pîş ez-în der-hîn-i vürûd-ı ağnam be-Âsitâne-i sa‘âdet kat‘ şüde narh-eş berây-ı bedel-i mühimmât-ı Tersâne-i âmire ve Cebehâne-i ma‘mûre an-beher kıyye 2 para be-cânib-i kassâbân-ı merkūme i‘tâ-eş mu‘tâd bûd ve hâlâ ağnam-ı merkūme bâ-takrîb-i sefer-i hümâyûn be-mahâll-i tevzî‘ kalîl vürûd ve esnâf-ı merkūme mutazarrır bûd ve fîmâ-ba‘d bâ-şart-ı mezkûrîn în kadar meblağ zam ve tanzîm şüde ve be-yed-i esnâf-ı merkūme sûret dâde fermûde el-vâki‘ der-sene 1223 ber-mûceb-i arzuhâl-i esnâf-ı merkūme ve memhûr i‘lâm-ı Mustafa Ağa Ser-kassâbân-ı hâssa ve takrîr ve telhîs ve fermân-ı âlî fî 4 R sene 1223 ve bâ-fermân-ı şerîf. Kadîm: 2 para Zam: 1 para [Toplam]: 3 para *** Kassâbân esnâfının ilmühaber kāimesi sûretidir. Hamîdiye Vakfı’ndan olan Yedikule ve Ebî Eyüb-i Ensârî Vakfı selhhânelerinin müste’cirleri olan kassâbân esnâfının takdîm eyledikleri bir kıt‘a arzuhâlleri mefhûmunda öteden beri sekene-i Dârü’s-saltanati’s-seniyye için celeb mâlı olarak Dersa‘âdet’e ağnam vürûdunda mu‘tâd üzere çâşnî tutulup narhı kat‘ olundukda esnâf-ı merkūmenin Tersâne-i âmire ve Cebehâne-i ma‘mûreye veregeldikleri gâvsâle ve meşîn ve tirşe mühimmâtının bedeli olarak beher kıyyede ikişer para dahi bunlara tahsîs ile ol vechile idâre edegelirler iken el-hâletü hâzihî sefer-i hümâyûn vukū‘una binâen bir müddetden beri Dersa‘âdet’e müstevfî ağnam gelmediğinden mâ‘adâ cüz’iyyât makūlesi gelen ağnam dahi şurûtları üzere mahâll-i tevzî‘a gelmeyip eyâdî-i âhara geçtiğinden esnâf-ı merkūme tehî-dest kalmaları takrîbiyle verdikleri mühimmâtdan dolayı iki yüz kîse akçeden ziyâde düyûna giriftâr olup bundan böyle ikişer para ile idâre-i umûr-ı mühimme edemeyecekleri âşikâr idiği beyânıyla kendilere zarardan vikāyeten vech-i muharrer üzere me’mûr-ı idâresi oldukları umûr-ı mühimmeyi ta‘tîlden ve müste’ciri oldukları evkāf-ı mezkûrenin vâridâtını kesrden sıyâneten bundan böyle tevârüd eden ağnamın tutulan çâşnîsine göre narhı kat‘ olundukda me’mûr-ı idâresi oldukları mühimmâta bedel fi’l-asl kendilere tahsîs kılınan ikişer paranın üzerine bir mikdâr dahi şey zammıyla tanzîmi husûsuna müsâ‘ade buyurulmasını istid‘â etmeleriyle sâdır olan fermân-ı âlî mûcebince keyfiyeti Kasabbaşı Ağa’dan isti‘lâm olundukda esnâf-ı merkūme husûs-ı mezbûr zımnında cânib-i mîrîden i‘âne olunması husûsunu dahi mukaddemâ bi’d-defa‘ât bâ-arzuhâl lede’l-istid‘â, hasâret-i mîrîyi mûcib olduğundan eğerçi istid‘âlarına müsâ‘ade buyurulmayıp lâkin mühimmât-ı matlûbenin edâsına bir türlü tâkat-yâb olamayıp medyûn olmalarıyla matlûb olan mühimmâtı vaktiyle tamamen edâ ve zamm-ı zamîme ve zarar iddi‘âsıyla vakten mine’l-evkāt ta‘cîz ve tasdî‘ etmemeleri şartıyla kat‘-ı fiyât vaktinde kendilere li-ecli’l-i‘âne bedel-i mühimmât olarak kadîmden tahsîs kılınmış olan ikişer paranın üzerine beher kıyyede birer para dahi zam ve ma‘a-zam üçer paraya iblâğ ile tanzîmi husûsuna müsâ‘ade buyrulduğu sûretde Belde-i Tayyibe’den çıkıp hasâret-i mîrî olmayacağını ve esnâf-ı merkūme dahi bundan böyle zarar u ziyân ve zamm-ı zamîme iddi‘âsında olmayarak me’mûr oldukları mühimmâtı vaktiyle edâya müte‘ahhid olduklarını beyân birle ta‘ahhüdleri vechile tanzîmiyle yedlerinde emr-i âlî i‘tâsı menût-ı re’y-i âlî idiğini i‘lâm etmekle i‘lâmı mûcebince Başmuhâsebe’ye kaydolunup esnâf-ı merkūme yedlerine sûret ve İstanbul Kādısı fazîletlü efendi hazretleri sicillâtına ilmühaberi verilmek bâbında bâ-takrîr ve telhîs fermân-ı âlî sâdır olmağın mûcebince kaydolunup sicillât ilmühaberi verilmekle esnâf-ı merkūme yedlerine işbu sûret verildi. Fî 7 R sene 1223