İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 465 Hüküm no: 346 Orijinal metin no: [125b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ordu için defterde yazılı olan miktarlarda marangoz, lağımcı, taşçı, taşkırıcı, su yolcu ve lağım hazineci tayin edilmesi Ordu-yı hümâyûna neccârân ve lağımcıyân ve taşcıyân ve taşkırıcı ve suyolcuyân esnâfına dâir emir. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- ve mefâhirü’l-emâcid ve’l-a‘yân hâssam mi‘mârbaşısı Mehmed Emin ve su nâzırı ( ) ve Lağımcıbaşı vekîli ( ) -zîde mecdühüm- tevkī‘-i refî‘-i hümâyûn vâsıl olucak ma‘lûm ola ki İşbu sene-i mübâreke mâh-ı Cumâdelûlâsı’nın gurresinde bi-avnihî sübhânehû ve te‘âlâ ihrâc olunacak ordu-yı hümâyûnumda mevcûd bulunmak için sâbıklarına kıyâsen tertîb olunan ma‘a-kalfa otuz nefer neccârân ve elli nefer lağımcıyân ve on nefer taşcıyân ve taşkırıcı ve on beş nefer ma‘a-ocaklık suyolcuyân ve ma‘a-zam otuz nefer lağım hazîneciyân neferâtları ihrâcı lâzım gelmekle sâbıkı ve derûn-ı emr-i şerîfime mevzû‘ sûret-i defter mûcebince ocaklık suyolcularından mâ‘adâ yüz otuz nefer esnâf-ı amelenin iktizâ eden ücretleri verilmek şartıyla mecmû‘u tekmîl âlât ü bisâtlarıyla siz ki mevlânâ ve hâssam mi‘mârı ve su nâzırı ve lağımcıbaşı vekîli mûmâ-ileyhimsiz, ma‘rifetinizle yarar kefîlleri tutulup ma‘rifet-i şer‘le eşkâl ve şöhretleri ve sâir oldukları mahalleri ile ale’l-esâmî tahrîr ve defter olunup mahâlline kayd için memhûr ve mumzâ defteri takdîm ve kendileri ta‘yîn olunmak fermânım olmağın hâssaten işbu emr-i celîlü’l-kadrim ısdâr ve ( ) ile irsâl olunmuşdur. İmdi vusûlünde bâlâda beyân olunduğu üzere neferât-ı merkūmenin müddet-i kalîlede tertîb ve tanzîmi ile defterinin takdîmi husûsuna mezîd-i sa‘y ü gayret eylemeniz bâbında fermân-ı âlî-şânım sâdır olmuşdur. Buyurdum ki: Hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i âlî-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi birle âmil olup hilâfına rızâ ve cevâz göstermeyesiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’r-râbi‘-aşer [min]-Rebî‘i’l-âhir sene erba‘a [ve] işrîn ve mieteyn ve elf. Kostantıniyye-i mahrûse *** Ordu-yı hümâyûna neccârân ve lağımcıyân ve taşcıyân ve sâir defteri. Defter-i tertîb-i ihrâc kerde-i neccârân ma‘a-kalfa ve lağımcıyân ve taşcıyân ve taşkırıcıyân ve hazîneciyân-ı lağımcı ve suyolcuyân ma‘a-ocaklık berây-ı sefer-i hümâyûn el-vâki‘ der-sene 1224 defter şüde ve sûret dâde fermûde bâ-telhîs [ve] fermân-ı âlî fî 13 R sene 1224 Berây-ı neccârân ma‘a-kalfa Neferen: 30 Berây-ı taşcıyân ve taşkırıcı Neferen: 10 Berây-ı lağımcıyân Neferen: 50 Berây-ı suyolcuyân ma‘a-ocaklık Neferen: 15 Berây-ı hazîneciyân-ı lağım Neferen: 15 Hayme: 15 [Toplam:] 30 Cem‘an Neferen: 135 Berây-ı ocaklık suyolcu Neferen: 5 Berây-ı sâire Neferen: 129 Kalfa: 1 [Toplam:] 130 Fî 13 R sene [1]224