İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 466 Hüküm no: 347 Orijinal metin no: [126a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gemilerle İstanbul’a gelen tülbentçilerle ilgili eşyanın esnafa eşit olarak dağıtılması Dülbendci esnâfına dâir emir. Bâ-sah. İstanbul Kādısı Fazîletlü Efendi Âsitâne-i sa‘âdete sefâin ile tevârüd eden dülbend ve dülbendci esnâfına müte‘allik eşyâ-yı sâirenin hîn-i vürûdunda esnâf-ı merkūmeden birkaç nefer erbâb-ı ihtikâr kapatıp cümlesini rahîs bahâ ile kendileri mübâya‘a ve ba‘dehû esnâfa dahi istedikleri gibi bey‘a ibtidâr ederek bu keyfiyet eşyâ-yı mezkûrenin galâ-yı bahâsını mûcib olduğu tahkīk olunmağın ibâdullâhı zarar ve hasârdan vikāyeten fezâhat-i mezkûrenin men‘i lâzımeden olmağla fîmâ-ba‘d gerek dülbend ve gerek dülbendci esnâfına müte‘allik sâir emti‘a ve eşyâ vürûd ettikçe esnâf-ı merkūme ve kethudâları ma‘rifetiyle cümlesine ale’s-seviye tevzî‘ olunmak ve o makūle muhtekir tâifesi tarafından kapatma sûretiyle eşyâ alınmamak husûsunun iktizâ-yı hüsn-i nizâmına mübâderet eyleyesin deyü. Fî 27 R sene [1]224