İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 470 Hüküm no: 349 Orijinal metin no: [126b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ahalisine günlük ihtiyaçları olan zahire, et gibi maddeler hususunda sıkıntı çektirilmemesi ve bunların narhtan fazla fiyatla satılmasına meydan verilmemesi Ecnâs-i zehâir ve lühûm ve erzâk-ı sâire narhı husûsu. Bâ-sah. İstanbul Kādısı Fazîletlü Efendi Dârü’l-hilâfeti’l-aliyye sekenesinin muhtâc oldukları zehâir ve lühûm ve sâirenin narh-ı cârîlerine dikkat olunmak husûsu bu def‘a tarafımıza hitâben şeref-rîz-i sudûr olan mübârek hatt-ı hümâyûn-ı şevket-makrûn-ı cihân-dârîlerinde müekkeden emr u fermân buyurulmuş olmağla mûcebince ibâdullâhın akvât-ı rûz-merrelerinden ecnâs-i zehâir ve lühûm ve erzâk-ı sâire husûslarında zarûret ve muzâyakadan himâyet ve sıyânetleriyle refâh-ı hâlleri ve erbâb-ı tama‘ ve ihtikârın hilâf-ı rızâ narh-ı cârîden ziyâdeye nesne füruht edememeleri husûsuna mezîd i‘tinâ ve dikkat ve o makūle hilâf-ı rızâ-yı hazret-i cihân-dârî harekete cesâret edenlerin lâzım gelen tedîblerinin icrâsı için keyfiyetin Bâb-ı Âlî’ye inhâsı vâcibeden olmağın imdi tenbîh ve te’kîdi lâzım gelen esnâf kethudâlarını ve sâir îcâb ve iktizâ edenleri huzûrunuza celb ve ihzâr ve mazmûn-ı hatt-ı şerîf-i inâyet-redîfi etrâfıyla kendilere ifâde ve ifhâm birle gereği gibi tenbîh ve te’kîde ve hilâfı vaz‘ ve hareket vukū‘uyla mazhar-ı tedîb ve nekâl olmakdan be-gāyet tehâşî ve mücânebet eylemelerini tehdîd ve men‘ ve tahzîr ve memnû‘ olmayanların icrâ-yı levâzım-ı tedîbleri için Bâb-ı Âlî’ye inhâya müsâra‘at ve siz dahi dâimen ve müstemirren bu husûsda dikkat ve nezâret ederek tahsîl-i rızâ-yı Hilâfet-penâhîye himmet eyleyeler deyü. Fî-gurreti C sene [1]224