İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 480 Hüküm no: 353 Orijinal metin no: [129a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki kumaş tezgahı sahiplerine Felemenk ve Hindkârî pamuk ipliği alım satımı işinde tellallık yapan Kirkor ve Rafael’in işine kimsenin karıştırılmaması Destgâh ashâbına penbe ipliği dellâllığına dâir fermân. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Kirkor ve Rafael nâm zimmîler Dîvân-ı Hümâyûn’uma arzuhâl edip İstanbul’da kâin sandalcılar ve kemhâcı ve bezzâz ve sâir destgâh ashâbları için Felemenk ve Hindkârî penbe ipliğini satıp alan bâzergânlara alıverilmesi için dellâllığına bâ-berât-ı şerîf-i âlî-şânım mutasarrıflar olup şurûtu üzere emti‘a-i mezkûru ma‘rifetleriyle alandan resmini alıp kanâ‘at ve edâ-yı hizmet birle kimesne tarafından müdâhale olunmak iktizâ etmez iken ba‘zı kimesneler bilâ-berât, emti‘a-i mezkûru bâzergânlara bizler alıveririz, ve, resm alınmak beratında münde[ri]c değildir, deyü müdâhale kaydında olduklarını beyân birle berat ve şurûtu kaydı ba‘de’l-ihrâc mugāyiri kimesne tarafından müdâhale olunmamak üzere emr-i şerîfim ısdârını istid‘â etmeleriyle Hazîne-i âmiremde mahfûz Başmuhâsebe defterlerine nazar olundukda dellâllık-ı mezkûr iştirâken mesfûrânın üzerlerinde olduğu ve emr-i şerîf i‘tâsı irâde-i aliyyeme menût idiği derkenâr olunmağla muktezâsı [129b] bi’l-fi‘il Dergâh-ı mu‘allâm Çavuşbaşısı iftihârü’l-emâcid ve’l-ekârim Ahmed -dâme mecduhû-ya havâle olundukda; İstanbul’da mârrü’z-zikr sandalcı ve bezzâz ve kemhâcı ve sâir destgâh ashâblarına Felemenk ve Hind ( ) penbe ipliği füruht eden bâzergânlardan rişte-i mezkûr alıverilmesi için dellâllığı mesfûrânın üzerlerinde olup umûr-ı dellâllığı ber-vech-i sadâkat ve istikāmet rü’yetlerine kimesne tarafından müdâhale olunmamak ve resm-i dellâliyeye dâir berat kaydında bir şey musarrah olmamağla ancak mersûmânın dellâllıkları umûruna kimesne tarafından müdâhale ve ta‘arruz olunmamak üzere emr-i şerîfim ısdârı re’y-i âlî-şânıma menût mevâddan idiğini i‘lâm etmekle imdi i‘lâmı mûcebince amel olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda sâdır olan emrim üzere amel edip dahi dellâllık-ı mezkûr iştirâken mesfûrânın üzerlerinde olduğu Hazîne-i âmirem defterlerinde mukayyed olmağla mûmâ-ileyhin i‘lâmı mûcebince şeref-yâfte-i sudûr olan işbu emr-i âlî-şânım mûcebince amel olunup mugāyir-i emr-i âlî-şânım mersûmânın dellâllıkları umûruna kimesne tarafından müdâhale ve ta‘arruz ettirmeyesin. Şöyle bilesin alâmet-i şerîfe i‘timâd kılasın. Tahrîren fi’l-yevmi’s-sâlis [ve’l]-işrîn [min]-Cumâdelevvel li-sene erba‘a ve işrîn ve mieteyn ve elf. Kostantıniyyeti’l-mahrûse