İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 481 Hüküm no: 354 Orijinal metin no: [129b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki Rumların, borçlarından dolayı hapsedilmeleri gerektiğinde sadece İstanbul ve Galata zindanlarında hapsedilmelerine dair fermanın cülus münasebetiyle yenilendiği Rum milletinin habslerine dâir fermân. Akza kuzâtü’l-Müslimîn, evleyi vülâti’l-muvahhidîn, ma‘deneyi’l-fazli ve’l-yakīn, râfi‘ayi a‘lâmi’ş-şerî‘ati ve’d-dîn, vâriseyi ulûmü’l-enbiyâi ve’l-mürselîn, el-muhtassaynı bi-mezîd-i inâyeti’l-Meliki’l-mu‘în İstanbul ve Galata kādıları -zîdet fezâilühümâ- ve iftihârü’l-ümerâi ve’l-ekâbir, müstecmi‘u cemî‘i’l-ma‘âlî ve’l-mefâhir, el-muhtassu bi-mezîd-i inâyeti’l-Meliki’l-kādir Dergâh-ı mu‘allâm Yeniçerileri ağası olan ( ) Ağa -dâme ulüvvuhû- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim Hâssa Bostancıbaşısı ( ) -dâme mecduhû- tevkī‘-i refî‘-i hümâyûn vâsıl olucak ma‘lûm ola ki Taht-ı âlî-baht-ı Osmânî üzere cülûs-i hümâyûn-ı meymenet-makrûnum vâki‘ olup umûmen tecdîd-i ahkâm fermânım olmağın İstanbul ve tevâbi‘i Rum Patriği ve Âsitâne’de mukīm cemâ‘at-i metrepolidân Rikâb-ı hümâyûnuma gelip re‘âyâ-yı Rum medyûnları i‘lâm-ı şer‘î ile müsbet ve mütehakkık olup edâ-yı deyn etmekden imtinâ‘ veyâhûd adem-i kudretleri zâhir olanların habs ve tescînleri lâzım geldikde Bâb-ı Âlî’de ve İstanbul ve Galata zindânlarında tevkīf olunageldikleri ve bu vechile mahbesleri müte‘ayyin ve müte‘ârif olup ve ziyâdesiyle aç ve muhtâc olanların millet tarafından kūt-ı yevmiyelerine bakılıp ba‘zan dahi tesâdduk tarîkıyla te’diye-i deyn ve azâbdan tahlîslerine mübâderet olunur iken bir vakitden beri o misillü medyûnlar müteferrik mahbeslerde bulunmaları cihetiyle hâl-i ma‘âşlarına bakılamadığından mâ‘adâ dâyinlere dahi min-vechin gadr ve zarar terettüb edegeldiği mukaddemâ takdîm eyledikleri bir kıt‘a memhûr arzuhâlleriyle inhâ ve fîmâ-ba‘d İstanbul dâhili mütemekkinlerinden olan medyûnlar İstanbul Zindânı’nda ve Galata ve Beyoğlu ve Tophâne ve Kasımpaşa ve Boğaziçi mutavattınlarından olanlar dahi Galata Zindânı’ndan gayri müteferrik mahbeslerde habsettirilmeyip zindânlardan hîn-i tahlîslerinde mübâşirlerine îcâb eden rüsûmâtı verilmek bâbında sâbıkā İstanbul ve Galata kādîlarına ve Yeniçeri ağasına ve Bostancıbaşı’ya hitâben emr-i şerîf sudûru istid‘â olunduğuna binâen vech-i meşrûh üzere o makūle medyûnlar İstanbul ve Galata zindânlarından mâ‘adâ mahbeslerde habsettirilmemek ve hîn-i halâslarında rüsûmâtı mübâşirlerine verilmek ve âhar mahâlde ahz olunurlar ise Bâb-ı Âlî’ye irsâl olunmak bâbında bin iki yüz on dokuz senesi evâil-i Şevvalinde Hudâvendigâr-ı esbak ammizâdem merhûm ve mağfiret-nişân Sultân Selim Han -tâbe serâhu- zamanında verilen emr-i şerîfi ibrâz ve tecdîdin ricâ ve niyâz etmeleriyle vech-i meşrûh üzere amel olunmak fermânım olmağın imdi siz ki mevlânâ ve Yeniçeri ağası ve bostancıbaşı-i mûmâ-ileyhimsiz, bâ-i‘lâm-ı şer‘î habs ve tescînleri lâzım gelen re‘âyâ-yı Rum medyûnları minvâl-i muharrer üzere İstanbul ve Galata zindânlarından gayri mahbeslerde habsettirilmemeleri ve hîn-i halâslarında rüsûmât-ı muktezıyesi mübâşirlerine verilmesi ve mahâll-i uhrâda ahz olunanların dahi Bâb-ı Âlî’ye irsâl ve tesyîrleri husûsuna ve infâz-i emr-i münîfime ihtimâm ve dikkat ve hilâfı vaz‘ ve hâlet vukū‘una ruhsat ve cevâzdan mübâ‘adet olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından hazer ve mücânebet eyleyesiz. Şöyle bilesiz alâmet-i şerîfe i‘timâd kılasız. Tahrîren fî-evâsıtı şehri Cumâdelâhir sene erba‘a ve işrîn ve mieteyn ve elf. Kostantıniyyeti’l-mahrûse