İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 482 Hüküm no: 355 Orijinal metin no: [130a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeşitli cins altın paraların belirtilen fiyatlardan alınıp verilmesi, eksik altının alınıp verilmemesi, İstanbul dışına altın gönderilmemesi, altın parayı kesenlerin cezalandırılacağı Altın fiyâtı ve nâkıs altının adem-i râyici. Bâ-sah. İstanbul Kādısı Fazîletlü Efendi Darbhâne-i âmirede kat‘ olunan ecnâs-i altının fiyâtı refte refte tezâyüd bulmakda ve Darbhâne-i âmireden dahi fiyât-ı kadîmesiyle verilmekde olduğundan cânib-i mîrîye hasâr-ı küllîyi mûcib ve fiyât-ı kadîmelerine ircâ‘ ettirilse el-yevm eyâdî-i nâsda mütedâvil olan ecnâs-i altın ziyâdeye alınıp verilir iken bu vechile tanzîmi ibâdullâha hasârı müstevcib olacağı cihetden cânib-i mîrîyi hasârdan vikāye farîzasına ri‘âyet ve ibâdullâh dahi zarardan vikāyet olunarak bu husûsun taht-ı nizâm ve râbıtaya idhâli lâzımeden olduğuna binâen lede’l-müzâkere el-yevm nâs beyninde cârî ve mütedâvil olduğu üzere yaldız altını on guruşa ve Macar altını dokuz buçuk guruşa ve fındık altını dokuz guruşa ve rub‘iyesi yüzer paraya ve İstanbul zer-i mahbûbu altı buçuk guruşa ve nısfiyesi üç guruş bir rub‘a ve Mısır zer-i mahbûbu beş buçuk guruşa ve nısfiyesi yüz on paraya alınıp verilmek husûsuna ittifâk-ı ârâ ile rızâ verilmiş ve Darbhâne-i âmire fiyâtının râyic-i vakte tatbîki emr-i meşrû‘ olmak hasebiyle ol bâbda cânib-i şerî‘at-i garrâdan fetvâ-yı şerîfe i‘tâ kılınmış olduğundan başka işbu fiyâtdan ziyâdeye vermeğe cesâret eder olur ise o makūleler tedîb-i şedîd ile icrâ-yı tedîbleri lâzım geleceği zikrolunan fetvâ-yı şerîfeye derc olunmuş olmağla fîmâ-ba‘d bu vechile ahz ü i‘tâ olunup bir akçe ziyâdeye alınıp verilmemek ve altının fiyâtının terakkīsinin bir sebebi dahi ba‘zı erbâb-ı tama‘ın taşra memâlike altın gönderdiklerinden neşet eylediği bedîdâr olmak hasebiyle fîmâ-ba‘d bu husûsa dahi cesâret olunmamak ve her kim Dersa‘âdet’den taşra altın gönderir ise gönderdikleri altın ahz ve cânib-i mîrîden zabtolunmak ve nâkısü’l-vezn altın vechen mine’l-vücûh râyic olmamak ve her kimin yedinde bulunur ise ahz olunup Darbhâne-i âmireye gönderilmek ve altın kat‘ına mütecâsir olanlar ale’d-devam taharrî ve tahkīk birle mücâzât-ı meşrû‘âları icrâ kılınmak üzere nizâm-ı kavîye bend olunması husûsu karâr-gîr olmakdan nâşî mûcebince evâmiri ısdâr ve iktizâ edenlere ekîden tenbîh ve i‘lân olunması bâbında hatt-ı hümâyûn-ı mehâbet-makrûn-ı mülûkâne şeref-bahş-ı sudûr <> olduğuna binâen bu husûs Dersa‘âdet’[d]e iktizâ edenlere ve taşra memâlike evâmir-i şerîfe ısdârıyla tenbîh ve te’kîd olunmağla imdi şeref-yâfte-i sudûr olan hatt-ı hümâyûn-ı şevket-makrûn mûcebince bi’l-cümle esnâf kethudâları ve mahalle imâmlarını huzûrunuza celb birle keyfiyeti etrâfıyla kendilere ifâde ve onlar dahi esnâflarına tenbîh ve mugāyir-i fermân-ı âlî hareket edenlerin tedîbât-ı meşrû‘âları icrâ kılınacağını ifâdeye mübâderet ve verilen karârdan bir akçe ziyâdeye alınıp verilmemesi ve nâkısü’l-vezn altının râyic olmaması husûsuna esnâf kethudâlarını ta‘ahhüd ettirterek ta‘ahhüdlerini hâvî sened ahz birle Başmuhâsebe’ye kayd için i‘lâma müsâra‘at eyleyesiz deyü. Fî 22 B sene [1]224