İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 485 Hüküm no: 358 Orijinal metin no: [130b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki ekmekçilere, ekmek vb. mamülatı belirlenen ağırlık, fiyat ve kalitede üretip satmaları hususunda tembihte bulunulması Nân-ı azîz ve francala narhına dâir. Bâ-sah. İstanbul Kādısı Fazîletlü Efendi Bu def‘a tâife-i habbâzâna verilen nizâm ve ahz eyledikleri zahîre dakīkından husûle geleceği nân-ı azîzin sikkesi ma‘lûm olup iki paralık nân-ı azîzin yüz dirhem, dört paralık francalanın yüz kırk dirhem olarak i‘mâl ve füruhtuna müsâ‘ade olunmuş iken habbâz esnâfının bugünlerde tabh ve i‘mâl eyledikleri nân-ı azîz ma‘lûm olan sikkeye mutâbık olmayıp nihâyet mertebe sikkeden dûn ve ekle adem-i salâhiyeti rû-nümûn olarak bu bâbda ibâdullâh dûçâr-ı zarûret ve ıztırâr ve simid ve çörek ve sâir tabh olunan o makūle eşyânın her birine dahi cümle ma‘rifetiyle ekmeğe verilen nizâma kıyâs ile kā‘ide-i kadîme üzere nizâm verilmiş iken eşyâ-yı mezkûre dahi müsâ‘ade olunan mikdârdan nâkıs tabh ve i‘mâl olunarak bu madde dahi ızrâr-ı fukarâyı mûcib idiği âşikâr olmağın bu makūle hilâf-ı emr-i Bârî fukarânın giriftâr-ı zarûret ve ıztırâb olmalarına vechen mine’l-vücûh rızâ-yı âlî olmayıp bu husûsa kemâliyle dikkat olunmak muktezâ-yı irâde-i seniyyeden olmağla imdi habbâzân kethudâsı ve nizâm ustalarını huzûrunuza celb ile fîmâ-ba‘d tabh edecekleri nân-ı azîzi ahz eyledikleri zehâirden ma‘lûm olan sikkeye mutâbık hâs ve a‘lâ ve tamam olarak tabh ve i‘mâl eylemelerini ve francalanın dört paralığı yüz kırk dirhem olarak ve simid ve çörek ve eşyâ-yı sâireyi dahi kā‘ide-i kadîme üzere nân-ı azîze kıyâsen verilen narh üzere pâk ve temiz ve tâmmü’l-vezn işlemelerini muhkem tenbîh birle bundan sonra dahi hilâf-ı rızâ-yı Pâdişâhî vaz‘ ve hareketi tecvîz eder olur ise tedîbât-ı lâyıkaları icrâ olunmak için isim ve şöhretleriyle keyfiyeti i‘lâma mübâderet eyleyesiz deyü. Fî 3 Şa‘bân sene [1]224