İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 486 Hüküm no: 359 Orijinal metin no: [130b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamalların, ahaliden haksız ücret talebinin önlenmesi için İstanbul Kadısının hamal ücretlerini nizâma bağlaması Hammâlân narhı için fermân. Bâ-sah. İstanbul Kādısı Fazîletlü Efendi Dârü’l-hilâfeti’l-aliyye’de olan bargir ve arka hammâllarının bir mahâlden bir mahalle eşyâ naklinde kurb ve bu‘d ve mesâfesine göre iktizâ edeceği ücret-i hammâliyeleri fi’l-asl nizâm-ı kavî tahtında olup ve nizâmları İstanbul Mahkemesi sicillâtında dahi mukayyed iken bir müddetden beri bu husûsa ihâle-i enzâr olunmadığından şîrâze-i nizâmları bozulup refte refte tavrından çıkarak el-hâletü hâzihî hammâlân tâifesi bir mahalle yük nakleylediklerinde insâf ve i‘tidâlden hâric evvelkinin beş altı katı ve dahi ziyâde hammâliye mutâlebe ve ahzıyla ibâdullâhı ızrâr etmekde oldukları inhâ ve ihbâr olunup ma‘a-hâzâ tâife-i merkūme usûl-i nizâmlarının hilâfı nakleyledikleri hamûleden ziyâde ahzına ictisâr ederek fukarâ-yı ibâdın ol vechile mugāyir-i şer‘-i şerîf giriftâr-ı rahne ve hasâr olmalarına vechen mine’l-vücûh rızâ-yı âlî olmadığından hammâlân gürûhunun ravâbıt-ı nizâmiyelerinin ez-ser-i nev tahkîmiyle ibâdullâhın zarar ve hasârdan vikāyeleri lâzımeden olmağla imdi tâife-i merkūmenin sicilde mahfûz ve mukayyed nizâmları keyfiyeti ba‘de’l-ihrâc usûl-i kadîmlerine tatbîk ve muktezâ-yı vakt ü hâle tevfîkan bir sûret-i haseneye bend ve tevsîk ile iktizâ-yı nizâmını i‘lâma mübâderet eyleyesiz deyü. Fî 4 Ş sene [1]224