İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 489 Hüküm no: 362 Orijinal metin no: [131a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa mimarlarının, amele ücretleri ve bina ile ilgili diğer hususlarda Şehremini’nin izni ve bilgisi olmadan kendi başlarına iş görmemeleri Amele fiyâtı ilmühaberi. Hâlâ Şehremîni Yusuf Rıza Efendi’nin Rikâb-ı kamer-tâb-ı mülûkâneye takdîm eylediği memhûr takrîri mefhûmunda me’mûr-ı idâresi olduğu Şehremîni anbârında ve gerek ebniye-i mîrîyye ve sâirede müstahdem esnâf-ı amelenin bundan akdem sâdır olan fermân-ı âlî ve İstanbul Kādısı fazîletlü efendi hazretleri ma‘rifetleriyle takdîm olunan bir kıt‘a defter-i müfredât üzere her bir sınıfına lâyığı vechile fiyât vaz‘ ve nizâma rabt ve iktizâ edenlere tenbîh olunmuş ise de hâssa mi‘mârı ağaların adem-i dikkat ve ihtimâm ve tekâsüllerinden nâşî kârger olunmayıp bugünlerde amelehâ-i merkūme istedikleri gibi ücret-i yevmiye taleb birle gûnâ-gûn cevr u ezâdan hâlî olmadıkları âşikâr ve bu husûsa dikkat mîrî ebniyelerine hayr u menfa‘at olduğundan başka fukarâ-yı ibâdullâhın da‘avât-ı hayriyelerine mazharına bedîdâr olmağla bu def‘a yine esnâf-ı amelenin vakt ü hâle göre efendi-i mûmâ-ileyh ma‘rifetiyle fiyât-ı [131b] mu‘tedileleri vaz‘ ve nizâma rabt ve bundan başka fîmâ-ba‘d hâssa mi‘mârı olan ağalar mîrî ebniyelerine dâir ve ebniye-i sâir[e-i] ibâdullâha mütedâir defter-i keşf ve mu‘âyene ve vukū‘ bulan nizâ‘âtın i‘lâmâtı ve ebniyeye dâir her bir eşyâ ve esnâf-ı amelenin vaz‘-ı fiyât ve rü’yet-i masâlihâtı ve kâffe-i husûsât-ı sâire-i ebniyede min-külli’l-vücûh ümenâ-i şehr bulunan efendilere ifâde ve istîzân eylemedikçe re’sen maslahatı rü’yet eylemeyip Şehremîni olanlar üzerlerine nezâret ve ma‘rifeti munzam olarak her bir husûsa dikkat olunmak üzere râbıtaya kayd ve müceddeden nezâreti hâvî emr-i âlî ısdâr ve iktizâ eden mahallere ilmühaberleri i‘tâsını inhâ etmekle takrîr-i mezkûr bâlâsına sudûr olan hatt-ı hümâyûn-ı şevket-makrûn-ı şâhânede “Ber-mûceb-i takrîr amel olunmak, hilâfından tehâşî ve mübâ‘adet oluna” deyü emr u fermân buyurulmuş olmağla mûcebince Şehremîni olanların kâffe-i ebniye husûsuna nezâret eylemeleri nizâmı Başmuhâsebe’ye kaydolunup iktizâ eden emri ısdâr ve ilmühaberleri i‘tâ olunmak bâbında fermân-ı âlî sâdır olmağın şeref-yâfte-i sudûr olan hatt-ı hümâyûn-ı şevket-makrûn ve sâdır olan fermân-ı âlî mûcebince emri ve lâzım gelen mahallere ilmühaberleri verilmek fermân buyurulmağın mûcebince kaydolunup emri ve iktizâ eden mahallere ilmühaberleri verilmekle İstanbul Kādısı fazîletlü Efendi hazretleri tarafına dahi işbu ilmühaber verildi. Fî 24 Şa‘bân sene [1]224