İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 499 Hüküm no: 367 Orijinal metin no: [134a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Kadısı’nın kahvenin fiyatında Padişah’ın belirlediği şekilde düzenleme yapıp huzura arz etmesi Kahvenin yirmi beş dirhemi 24 paraya râyici. Bâ-sah. İstanbul Kādısı Fazîletlü Efendi Fe-lillâhi’l-hamd Der-aliyye’ye peyder pey kahve tevârüd etmekde ise de bu âna kadar [ardı] aranmadığından nedreti vaktinde ne vechile füruht olunur ise yine ol vechile füruht olunmakda olduğu sem‘-i hümâyûna vâsıl olmakdan nâşî “Bi-hamdihî te‘âlâ kahve peyder pey gelip terâküm etmede iken ve bâzergânlar yedlerinde olan kahvelerini tevzî‘a hâhişlerine nazaran fiyâtı tenzîl bulmak îcâb ederdi. Ne sebebe mebnî dirhemi bir paraya füruht olunur. Bu def‘a tevzî‘ olunacak kahvenin beher yirmi beş dirheminde bir para tenzîl olunmak üzere tevzî‘ ve tanzîmine ibtidâr oluna” deyü mübârek hatt-ı hümâyûn-ı şevket-makrûn şeref-bahş-ı sudûr olmağla imdi ber-mantûk-ı hatt-ı hümâyûn bu def‘a tevzî‘ olunacak kahvenin beher yirmi beş dirheminde bir para tenzîli hesâbıyla tanzîmi husûsuna mübâderet ve tenzîl ve ol vechile tevzî‘ olduğunu arz olunmak için huzûrumuza i‘lâma mübâşeret eyleyesiz deyü. Fî 26 L. sene [12]24