İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 502 Hüküm no: 369 Orijinal metin no: [134b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata tüccarlarının elindeki elli bin vakıyye kahvenin esnafa dağıtılması ve esnafa kolaylık olması için de bedellerinin Hazine’ye parça parça ödenmesi Kahve tevzî‘i. Bâ-sah. İstanbul Kādısı Fazîletlü Efendi Îcâb eden bahâsı cânib-i mîrîye âid olarak Galata’da tüccâr yedinde olan elli bin vakıyye mikdârı kahvenin esnâfa tevzî‘ ve râyic-i vakt ile bahâsı Hazîne-i âmireye teslîmi lâzımeden olup ancak meblağ-ı mezbûrun bir gün evvel Hazîne-i âmireye teslîmi muktezî ise de bu esnâda esnâfa tevzî‘ât te‘âkub eylediğinden esnâfı sıyânet için meblağ-ı mezbûrun def‘aten teslîmi tecvîz olunmayıp hem cânib-i mîrîyi ve hem esnâfı himâyet sûretiyle tanzîmi münâsib görülerek ol mikdâr kahvenin bugünden tevzî‘ine mübâşeret ile râyic-i vakt üzere îcâb eden bahâsından yetmiş beş bin guruşu on beş yirmi gün zarfında tahsîl ve Hazîne-i âmireye teslîm olunup mâ‘adâ bahâsı yirmi beş senesi Rebî‘ülâhiri evâhirine dek ceste ceste Hazîne-i âmireye teslîm olunmak üzere tanzîmine irâde-i seniyye ta‘alluk etmekle imdi esnâf-ı merkūmenin kethudâsı ve sâir lâzımü’l-ihzâr olanları nezdinize celb ve irâde-i aliyyeyi kendilere tefhîm birle zikrolunan elli bin vakıyye mikdârı kahveyi bugünden tevzî‘a mübâşeret ve bahâsından yetmiş beş bin guruşunu alâ-eyyi hâl serî‘an tahsîl ve Hazîne-i âmireye teslîm ettirtip mâ‘adâsının bahâsı ber-vech-i muharrer Rebî‘ülâhir evâhirine dek altı mâh zarfında ceste ceste teslîm-i Hazîne-i âmire olunmak üzere esnâfca râbıtasına himmet ve sûret-i nizâmını i‘lâma mübâderet eyleyesiz deyü. Fî 3 Za sene [1]224