İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 502 Hüküm no: 370 Orijinal metin no: [134b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esnafın ölçü ve tartı ayarlarının daima kontrol altında tutulması, fiyatların iyice araştırıldıktan sonra en uygun olan şekilde belirlenmesi Es‘âr husûsuna dâir fermân. Bâ-sah. İstanbul Kādısı Fazîletlü Efendi Fe-lillâhi’l-hamdü ve’l-minne vakte göre erzâkın kesret ü vefreti olduğundan alınıp satılması ehven bahâ ile olmadığından ibâdullâhın kūt-ı lâ-yemûtlarına vüs‘at gelmediği ancak muhtekir tâifesinin ihtikârından nâşî olup her bir şeyi gālî bahâ ile füruht eyledikleri vâsıl-ı sem‘-i hümâyûn olduğuna binâen “İbâdullâhın külle yevm muhtâc oldukları erzâk ve havâiclerinden olan eşyâ ve es‘âra bakılmadığından bahâları günbegün tezâyüd bulmakda olduğundan muhtekir makūlesi dâimâ gözetilip dirhem ve mîzânları ayâr olunarak ve ayakkabı ve emti‘a ve akmişe ve me’kûlâta müte‘allik kâffe-i eşyâyı nasıl alıp ve nasıl satıyorlar, tahkīk ederek her bir şeyin i‘tidâl üzere vaz‘-ı fiyât olarak bu husûsa dâimâ ihtimâm ve dikkat olunup asla tekâsül ve tesâmuh olunmaya.” meâlinde bu def‘a hatt-ı hümâyûn-ı şevket-makrûn şeref-yâfte-i sudûr etmekle imdi ber-mantûk-ı hatt-ı hümâyûn amel ve hareket cümlemize farîza-i zimmet olmak hasebiyle muhtekir tâifesine vechen mine’l-vücûh ruhsat gösterilmeyerek esnâfın dirhem ve mîzânlarına bakılarak ve ayakkabı ve emti‘a ve akmişenin dahi keyfiyeti tahkīk olunarak cümlesine başka başka hadd-i i‘tidâlde fiyât vaz‘ıyla tevsî‘-i ma‘âş-ı ibâdullâha dikkat ve vaz‘ olunan fiyâtdan bir pul ziyâdeye es‘âr ve eşyânın satılmaması husûsuna mezîd ihtimâm ve dikkat ve eğer fiyâtından ziyâdeye füruht ederi olur ise her kim olur ise olsun li-ecli’t-tedîb isim ve şöhretlerini Bâb-ı Âlî’ye i‘lâma mübâderet ve bu husûslarda zinhâr u zinhâr gaflet ve tesâmuh olunmayıp siz dahi ale’d-devam ihtimâm ve dikkat ve nezâret eyleyesiz deyü. Fî 26 L. sene [1]224