İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 507 Hüküm no: 376 Orijinal metin no: [135b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu esnafı tayini Ordu-yı hümâyûna esnâf ihrâcı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim bi’l-fi‘il Dergâh-ı mu‘allâm Yeniçerileri Ocağı sekbânbaşısı [( )] -dâme mecduhû- ve kıdvetü’l-emâcid ve’l-a‘yân Ordu-yı hümâyûnum ağası ( ) -zîde mecduhû- ve mefâhirü’l-emâsil ve’l-akrân esnâf kethudâları ve ihtiyârları ve üstâdları -zîde kadrühum- tevkī‘-i refî‘-i hümâyûn vâsıl olucak ma‘lûm ola ki Fe-lillâhi’l-hamdü ve’l-minne, işbu sene-i mübârekede düşman-ı dînimiz olan Moskov keferesiyle vukū‘ bulan muhârebelerde galebe ve nusret asâkir-i zafer-meâsirim tarafında vâki‘ olmuş ise dahi bi-avnihî sübhânehû ve te‘âlâ sene-i âtiyede dahi kefere-i menhûseden ahz-ı intikām olunmak niyet-i hâlisasıyla sefer-i hümâyûnum muhakkak olduğuna binâen ordu-yı hümâyûnumda tecemmu‘ edecek asker-i muvahhidînin iktizâ eden malzemesi tedârükünde zarûret ve muzâyaka çekilmemek için esfâr-ı sâbıkada olageldiği üzere ordu-yı zafer-makrûnumda mevcûd bulunmak üzere hırfet esnâfının aynı orduları ihrâcı lâzımeden olmağla Mevkūfât’dan ihrâc ve derûn-ı emr-i şerîfime mevzû‘an irsâl olunan memhûr ve mümzâ sûret-i defter mûcebince bin iki yüz yirmi beş senesine mahsûben dahi İstanbul’da vâki‘ yirmi sekiz aded hırfetin iktizâ eden masârifleri beynlerinde mer‘î tutulan yamaklarının birbirlerine imdâd ve i‘âneleriyle gördürülüp tamamen haymeleri ihrâc ve ordu-yı hümâyûnum meştâdan sahrâya hareketinden mukaddem ordu-yı hümâyûnumda mevcûd bulunmak için irsâl olunması husûsuna ziyâde ihtimâm ve dikkat olunmak fermânım olmağın hâssaten işbu emr-i şerîfim ısdâr ve ( ) ile irsâl olunmuşdur. İmdi vusûlünde siz ki mevlânâ ve sekbânbaşı-i mûmâ-ileyhimâsız, ber-vech-i muharrer ordu-yı hümâyûnumda mevcûd bulunmak için Âsitâne-i aliyyemden ihrâcı tertîb olunan ol mikdâr hırfetin tanzîmine bi’l-ittifâk mezîd-i sa‘y ü gayret ve esfâr-ı sâbıkaya makīs olmayıp serî‘an tanzîmleri lâzımeden idiğini tenbîh ve te’kîde mübâderet eyleyesiz ve siz ki Ordu ağası ve esnâf kethudâları mûmâ-ileyhimsiz, siz dahi mûceb-i emr-i şerîfimle amel ve hareket ve hilâfından gāyetü’l-gāye hazer ve mücânebet eylemeniz bâbında fermân-ı âlî-şânım [sâdır olmuşdur. Buyurdum ki:] [136a] ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi birle âmil olasız. Şöyle bilesiz alâmet-i şerîfe i‘timâd kılasız. Tahrîren fi’l-yevmi’l-âşir [min]-şehri Zilka‘de sene erba‘a [ve] işrîn ve mieteyn ve elf. Be-meştâ-yı Şumnu *** Sûret-i defter. Defter-i tertîb-i ihrâc kerde-i orducuyân-ı esnâf-ı mezkûre an-cânib-i şehr-i merkūm berây-ı sene 1225 der-sefer-i hümâyûn der-cânib-i Moskov be-meştâ-yı Şumnu ihrâc ve be-ordu-yı hümâyûn sevk ve tesyîr şüde fermûde el-vâki‘ der-sene 1224 An-cânib-i Mahrûse-i İstanbul Hırfet-i hallâcân Hayme: 2 aded Hırfet-i şemşîrgerân Hayme: 2 aded Hırfet-i kemângerân Hayme: 2 aded Hırfet-i semerciyân Hayme: 3 aded Hırfet-i arpacıyân Hayme: 4 aded Hırfet-i sarrâcân Hayme: 4 aded Hırfet-i bezzâzân Hayme: 4 aded Hırfet-i eskiciyân Hayme: 4 aded Hırfet-i berberân Hayme: 6 aded Hırfet-i nalbandân Hayme: 4 aded Hırfet-i mumcuyân Hayme: 2 aded Hırfet-i başcıyân Hayme: 2 aded Hırfet-i nalçacıyân Hayme: 4 aded Hırfet-i attarân Hayme: 4 aded Hırfet-i bakkālân Hayme: 4 aded Hırfet-i mûytâbân Hayme: 4 aded Hırfet-i aşcıyân Hayme: 2 aded Hırfet-i hayyâtân Hayme: 3 aded Hırfet-i haffâfân Hayme: 8 aded Hırfet-i çukacıyân Hayme: 2 aded Hırfet-i gazzazân Hayme: 2 aded Hırfet-i câmeşûycuyân Hayme: 3 aded Hırfet-i kassâbân Hayme: 2 aded Hırfet-i çadırcıyân Hayme: 1 aded Hırfet-i demirciyân Hayme: 1 aded Hırfet-i kalaycıyân Hayme: 1 aded Hırfet-i habbâzân Hayme: 4 aded Hırfet-i kazgancıyân Hayme: 1 aded Cem‘an yekûn Hırfet: 28 aded Hayme: 85 aded Tahrîren fî 7 Zilka‘de sene 1224