İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 509 Hüküm no: 377 Orijinal metin no: [136a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeşitli cins altın paraların belirtilen fiyatlardan alınıp verilmesi, eksik altının alınıp verilmemesi, İstanbul dışına altın gönderilmemesi, bunları yapanların ve altın parayı kesenlerin cezalandırılacağı Altın ve riyâl fiyâtı. Bâ-sah. İstanbul Kādısı Fazîletlü Efendi Darbhâne-i âmirede kat‘ olunan ecnâs-i altının fiyâtı refte refte tezâyüd bulmakda ve Darbhâne-i âmireden dahi fiyât-ı kadîmesiyle verilmekde olduğundan cânib-i mîrîye hasâret-i külliyyeyi mûcib ve fiyât-ı kadîmelerine ircâ‘ ettirilse el-yevm eyâdî-i nâsda mütedâvil olan ecnâs-i altın ziyâdeye alınıp verilir iken bu vechile tanzîmi dahi ibâdullâha hasârı müstevcib olacağı cihetden cânib-i mîrî hasârdan vikāyet ve ibâdullâh dahi zarardan sıyânet olunarak bu husûsun taht-ı nizâm ve râbıtaya idhâli lâzımeden olduğuna binâen el-yevm nâs beyninde cârî ve mütedâvil olduğu üzere yaldız altını on guruşa ve Macar altını dokuz buçuk guruşa ve fındık altını dokuz guruşa ve İstanbul zer-i mahbûbu altı buçuk guruşa ve nısfiyesi yüz otuz paraya ve Mısır zer-i mahbûbu beş buçuk guruşa ve nısfiyesi yüz on paraya alınıp verilmek ve riyâl-i Frengî dahi beş guruşa ahz ü i‘tâ olunup ziyâdeye râyic olmaması ve ba‘zı erbâb-ı tama‘ın taşra memâlike altın gönderdiklerinden bu keyfiyet altının terakkī-i fiyâtına sebeb olduğundan fîmâ-ba‘d her kim Dersa‘âdet’den taşraya altın gönderir ise gönderdikleri altın ahz ve cânib-i mîrîden zabtolunmak ve nâkısü’l-vezn altın vechen mine’l-vücûh râyic olmamak ve her kimin yedinde bulunur ise ahz olunup Darbhâne-i âmireye gönderilmek ve altın kat‘ına mütecâsir olanlar taharrî ve tahkīk birle mücâzâtları icrâ kılınacağı iktizâ edenlere bu def‘a bâ-evâmir-i aliyye tenbîh ve i‘lân kılınmağla imdi fîmâ-ba‘d envâ‘-ı altın ve riyâl-i mezkûrun fiyât-ı mukarreresinden bir akçe ziyâdeye alınıp verilmemesi ve ziyâde alıp verenlerin ve altın kat‘ına mütecâsir olanların ve nâkısü’l-vezn altını tervîc edenlerin tedîbât-ı lâyıkaları icrâ kılınacağı ve Darbhâne-i âmirede kat‘ olunan rub‘ ve beşliği ba‘zı kesân kâr ittihâzile Darbhâne-i âmireden ahz ve fiyât-ı mu‘ayyenesinden birer ikişer para ziyâdeye tütüncü ve köşebaşı sarrâflarına verip onlar dahi li-ecli’t-ticâre rub‘u on iki paraya ve beşliği altı paraya taşra memâlike irsâle cesâret eyledikleri tahkīk olunmağla fîmâ-ba‘d zikrolunan beşlik ve rub‘ fiyât-ı mu‘ayyenesinden ziyâdeye alınıp verilmemek ve taşra memâlike irsâl olunmamak ve eğer her kim bu kâr-ı mekrûha cesâret eder ise beher hâl tedîbât-ı lâyıkaları icrâ kılınacağı muhakkak olmağla ona göre amel ve hareket ve hilâfından tehâşî ve mücânebet eyleyesiz deyü. Fî 3 Zilhicceti’ş-şerîfe sene 1224