İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 513 Hüküm no: 380 Orijinal metin no: [137a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeşitli cins altın paraların belirtilen fiyatlardan alınıp verilmesi, eksik altının alınıp verilmemesi, İstanbul dışına altın gönderilmemesi, bunları yapanların ve altın parayı kesenlerin cezalandırılacağı Altın fiyâtı. Bâ-sah. İstanbul Kādısı Fazîletlü Efendi Hazretleri El-yevm eyâdî-i nâsda mütedâvil ve cârî olan yaldız altını on guruşa ve Macar altını dokuz buçuk guruşa ve fındık altını dokuz guruşa ve İstanbul zer-i mahbûbu altı buçuk guruşa ve nısfiyesi yüz otuz paraya ve Mısır zer-i mahbûbu beş buçuk guruşa ve nısfiyesi yüz on paraya ve riyâl-i Frengî dahi beş guruşa ahz ü i‘tâ olunup ziyâdeye alınıp verilmemek ve her kim Dersa‘âdet’den taşralara altın gönderir ise gönderdikleri altını ahz ve cânib-i mîrîden zabtolunmak ve nâkısü’l-vezn altın vechen mine’l-vücûh râyic olmamak ve her kimlerin yedlerinde bulunur ise ahz olunup Darbhâne-i âmireye gönderilmek ve altın kat‘ına mütecâsir olanların ve Darbhâne-i âmirede kat‘ olunan rub‘ ve beşliği fiyât-ı mu‘ayyenesinden ziyâdeye alıp ve veren ve taşra memâlike irsâle cesâret edenlerin bi’t-taharrî tedîbât-ı lâyıkaları icrâ kılınmak husûsları mukaddem ve muahhar defa‘âtle bâ-evâmir-i aliyye cümleye tenbîh ve te’kîd olunmuş iken el-hâletü hâzihî ba‘zı kendini bilmez kimesneler hilâf-ı emr-i âlî ve mugāyir-i irâde-i seniyye zikrolunan ecnâs-i nukūdu fiyât-ı mukarrere-i ma‘lûmelerinden ziyâdeye ahz ü i‘tâ etmekde oldukları tahkīk olunup bu husûs iki def‘adır ki müekked evâmir-i aliyye ile tenbîh ve te’kîd olunmuş olduğundan bundan sonra bu emr-i memnû‘a mütecâsir olanlar her kim olur ise olsun tahkīk olunduğu ânda bilâ-imhâl cezâsı tertîb olunacağı muhakkak ve mukarrer olmağla imdi bi’l-cümle mahallât imâmlarını ve esnâf kethudâlarını huzûrunuza ihzâr birle mazmûn-ı emr u irâde-i kātı‘ayı kendilere ifâde ve bundan böyle zikrolunan ecnâs-i nukūdu fiyât-ı mu‘ayyenelerinden ziyâdeye her kim alır ve verir ve altın kat‘ına ve taşralara altın irsâline cesâret eder olur ise haber alındığı ânda bilâ-emân cezâları tertîb kılınacağını gûş-ı hûşlarına ilkā ve tefhîm ederek işbu irâde-i seniyyenin icrâsına nezâret eyleyesiz deyü. Fî 3 M sene [1]225