İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 514 Hüküm no: 381 Orijinal metin no: [137a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul kazasının 1225 senesi avarız vergisinin toplanması Avârız fermânı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Hazîne-i âmirem defterleri mûcebince İstanbul kazâsının iki bin yedi yüz bir buçuk ve bir sülüs avârız hânesi olup bin iki yüz yirmi beş senesine mahsûben cem‘ ve tahsîli lâzım gelmeğin ( ) der-uhde olunup yedine [verilen] mühürlü ve nişânlu Mevkūfât defteri sûreti mûcebince cem‘ ve tahsîl ettirilmek fermânım olmuşdur. Buyurdum ki: Hükm-i şerîfimle mübâşir vardıkda bu bâbda sâdır olan emrim üzere amel edip dahi sene-i mezbûra mahsûben kazâ-i mezkûrun ol mikdâr avârız hânesi olup Tersâne-i âmirem ocaklığı olmağla beher hânesinden dörder yüz yirmi dokuzar akçe kürekci bedellerin irsâl olunan mühürlü ve nişânlu Mevkūfât defteri sûreti mûcebince vakt ü zamanıyla yerlü yerinden cem‘ ve tahsîl ve dâhil-i Tersâne-i âmirem ettirtip hilâf-ı emir ve defter kimesneye te‘allül ve muhâlefet ettirmeyesin ve bundan mâ‘adâ mübâşir-i merkūmun cihet-i ma‘âşı için her bir avârız hânesinden onar akçe vech-i ma‘âş ve on beşer akçe harc-ı Tersâne-i âmirem için aldırılıp ve avârız için alınan akçenin her yüz on akçesinden bir esedî guruş tahsîl olunup ve hîn-i tahsîlde mîrî için alınan akçeyi Hazîne-i âmireme alındığı vech üzere aldırılıp bundan ziyâde ve noksan alınmaya ve aldırmayasız. Kesr-i defterden ve naks-ı hâneden ve fermân-ı âlî-şânımdan ziyâde mutâlebesiyle zulm ü te‘addîden gāyetü’l-gāye hazer ve ictinâb eyleyesiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis [ve’l]-işrîn [min]-Zilka‘de sene erba‘a ve işrîn ve mieteyn ve elf. Kostantıniyyeti’l-mahrûse