İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 523 Hüküm no: 390 Orijinal metin no: [139a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eshâm ile ilgili uygulamalara dair emir Eshâma müte‘allik emir. İstanbul Kādısı Fazîletlü Efendi Ricâl ve nisvâna ber-vech-i mâlikâne füruht olunagelen envâ‘-ı eshâmın mutasarrıf ve mutasarrıfeleri hâl-i hayatlarında mutasarrıflar olup ba‘de’l-vefât kā‘ide-i mer‘iyye-i mîrîyye üzere mahlû[l]lerinden yine cânib-i mîrîye âid ve râci‘ olacağı yedlerine i‘tâ olunan beratlarında meşrût idiği ve işbu eshâm için mahsûs Sehim Rûznâmçesi ta‘bîriyle kalem ihdâs ve mahlûlâtın tecessüs ve taharrîsinde ziyâde ihtimâm ve dikkat olunmakda ise de hasbe’l-iktizâ birkaç seneden beri eshâmın kesret üzere füruhtu takrîbiyle ve sihâm alan ricâl ve nisvânın ba‘zısı kenar mahallerde olmak hasebiyle mahlûlâtı haber alınamaya[ra]k aralıkda hasâret-i mîrîyi mûcib hâlât vukū‘a geldiği ecilden fîmâ-ba‘d gurre-i mâh-ı Rebî‘ülevvelden i‘tibâr ile gerek Askerî Kassâmı efendi tarafından ve gerek Üsküdar ve Galata ve Hâslar kādîları efendiler ve Teftîş Mahkemeleri ve Beytü’l-mâl emînleri câniblerinden ricâl ve nisvân terekeleri ve ba‘zı husûslar zuhûr ve tahrîrinde isim ve şöhretleri ve sâkin ve sâkine oldukları mahallerin tasrîhıyla defter olunup defter-i mezkûr kalemlerinde olan kaydlarına [139b] tatbîk birle vefât edenlerin uhdelerinde eshâm ve mukāta‘a var ise mahlûllerinden cânib-i mîrîden zabtolunmak için zikrolunan defterler beher mâh Defterdâr efendi tarafına gönderilmesi husûsuna irâde-i seniyye ta‘alluk etmekden nâşî ol bâbda iktizâ edenlere hitâben beyâz üzerine fermânlar ısdârıyla başka başka tenbîh ve te’kîd olunmuş olmağla imdi işbu mâh-ı mübârek-i Rebî‘ülevvelin gurresinden bed’ ile İstanbul ve merbût olan mahâkimde beledî ve sâir vukū‘-yâfte olan de‘âvî ve tereke maddelerinde dikkat ve taharrî olunarak tahrîr ve uhdelerinde eshâm ve mukāta‘at var ise cânib-i mîrîden zabtı için kalemlerinden dahi tahkīk ve tatbîk olunmak üzere ricâl ve nisvândan ve milel-i selâseden fevt olanların mahalleri ve isim ve şöhretleri tasrîh ve beyân birle defter olunup defter-i mezkûrun beher mâh izzetlü Defterdâr efendi tarafına irsâli husûsuna mübâderet ve iğmâz ve tesâmuh ile hasâret-i mîrîyi mûcib hâlât vukū‘a gelmemesine mezîd-i ihtimâm ve dikkat eyleyesin deyü. Fî 29 Saferü’l-hayr sene 1225